Kryetari i Bashkisë Erjon Veliaj tha se nuk ka rivalë brenda Partisë Socialiste. Në studion e emisionit “Debati në Channel One”, Veliaj tha se Sajmir Tahiri nuk ka qenë asnjëherë konkurrenti i tij brenda PS, kjo është e gjitha një legjendë urbane.
“Kemi pasur një marrëdhënie shumë korrekte në qeveri, sigurisht në profile shumë të ndryshme kështu që ato dy vite që unë kam qenë në qeveri kemi pasur një raport shumë korrekt dhe secili në ngastrën e vet.
Marrëdhëniet tona personale kanë qenë të shkëlqyera. Pasi ndodhi kjo kam komunikuar, jemi dhe komshinj. Kjo historia e rivalitetit dhe debatit kanë qenë të gjitha legjenda urbane. Nuk mbaj mend të kemi debatuar ndonjëherë.
Shpesh herë kemi bërë batuta me njëri tjetrin për këtë konkurencën që më shumë e ëndërronin të tjerët sesa ekzistonte”, tha Veliaj.
Lidhur me emrin që i ka vendosur djalit të tij, Veliaj tha se “kur një nga miqtë tanë, i ndjeri Gjergji Filipi themeloi në INSTAT një database të emrave shqiptarë, më bëri përshtypje që njëri nga emrat e fundit fare ishte emri Kajan (Kajo).Ishin vetëm 10 veta gjallë me këtë emër. i thashë Ajolës: Gjynah që nuk vënë emra shqiptarë. Ne jemi familje partizanësh”.
