Ministri i Brendshëm, Sandër Lleshaj, ka reaguar ndaj protestës së djeshme të opozitës, ndërsa e cilësoi atë të dhunshme.
Ai paralajmëroi drejtuesit e opozitës se do të përballen me akuzat për cënimin e rendit kushtetues, duke shtuar se dhuna e ushtruar dhe organizimi i protestave të tilla, po kthehen në një rrezik për rendin kushtetues.
Sipas tij, lëndët piroteknike të hedhura ndaj forcave të rendit janë legale, por ato u përdorën kundër një policie të pambrojtur ndaj tyre.
Lleshaj është larguar nga konferenca për mediat pa u përballur me pyetjet e gazetarëve, ndërsa duket shfaqja e tij në media kishte vetëm një qëllim: paralajmërimin dhe kërcënimin e organizatorëve të protestës.
Lleshaj tha se qytetarët tashmë e kanë kuptuar dhe ndaj nuk kanë shkuar pas atyre që kërkojnë dhunë.
“Dhuna tregon dëshpërimin e organizatorëve. Protesta u zhvendos nga Kryeministria te Parlamenti në mënyrë të pabesë, duke krijuar incidente të rënda.
Organizatorët nuk kishin ndërmarrë asnjë masë, për të garantuar se protesta do të ishte paqësore. U pa qartë se nga organizatorët ishin marrë masa për të përdorur grupe sulmi kundër institucioneve. Nga organizatorët u përdorën thirrje të hapura anti-kushtetuese.
Protesta edhe njëherë kontribuoi për tërheqjen e vëmendjes së policisë nga lufta kundër grupeve kriminale te protestat e paligjshme.
Dhunuesit u braktisën nga qytetarët. Grupi i mirëorganizuar dhe i mirëpajisur ushtroi një dhunë joproporcionale ndaj forcave të policisë. Policia e Shtetit përballoi dhunën e egër duke dhënë një shembull dinjiteti.
Një pjesë e punonjësve të policisë së shtetit u lënduan dhe u plagosën, duke përfunduar edhe në spital.
Sot po tentohet të rrëzohen institucionet e shtetit nga të njëjtët që dje i rrëzuan ato nga brenda, por s’kanë asnjë shans ta bëjnë sot, duke përdorur dhunën.
Pas protestës janë marrë masa të shpejta për të ndaluar, shoqëruar apo arrestuar personat që kanë konsumuar veprat e ndryshme penale.
Organizatorët e protestës do të përballen me ligjin. Problemi është që protesta po zhvendoset nga një cënim i rendit publik në një cënim të rendit kushtetues, çka do të thotë se organizatorët mund të përballen me akuzën e cënimit të rendit kushtetues”, tha Lleshaj.
