Nuk jam në Shqipëri për të negociuar dhe zgjidhur krizën politike. Kështu u shpreh Mattheë Palmer, zv.Ndihmës Sekretari Amerikan i Shtetit, gjatë një takimi që ka pasur me gazetarët.
Palmer po zhvillon një vizitë në Tiranë, në kuadër të një turi rajonal, ndërsa ëstë takuar dje me kryeministrin Edi Rama, ndërsa sot takohet me kreun e PD-së, Lulzim Basha dhe atë të LSI-së, Monika Kryemadhi.
Duke iu referuar situatës politike në vend, Palmer tha se të gjitha partitë duhet të marrin pjesë në zgjedhje.
Ai shtoi se është përgjegjësi e opozitës pjesëmarrja në proçesin zgjedhor, ndërsa shtoi se ajo mund të ndajë vizionin e saj me mbështetësit. Palmer kërkoi që opozita të ketë kandidatë të fortë në zgjedhje që të fitojë , ndërsa sugjeroi prej saj paraqitjen e një platforme atraktive.
Djegien e mandateve të deputetëve, zyrtari i lartë amerikan, nuk e konsideroi si zgjidhje.
“Shqipëria duhet të luftojë krimin e organizuar dhe korrupsionin”, u shpreh zyrtari i DASH, duke shtuar se reforma në drejtësisë duhet të vijojë dhe të çohet përpara.
Zyrtari i DASH theksoi se qeveria është legjitime dhe SHBA po bashkëpunojnë me të.
Ndërkohë lidhur me lobimin e PD-së në SHBA, zv. Ndihmës Sekretari amerikan theksoi se kjo çështje është në hetim në Shtetet e Bashkuara dhe ai nuk mund të bënte komente të mëtejshme.
Lidhur me influencën ruse në Rajon, Palmer tha se SHBA kërkojnë transparencë. “Ne duam që Rajoni të ketë të ardhme. Shqipëria është një target i vështirë për Rusinë”, theksoi Palmer.
Ndërkohë lidhur me ambasadorin e ri të SHBA në Tiranë, Palmer tha se shpreson që shumë shpejt të ketë një emër.
