Ish-deputeti i PD, Ervin Salianji, rrëfen miqësitë që ka me politikanët në partinë më të madhe të opozitës, raportet me deputetin socialist Sadri Abazi, si dhe akuzat në drejtim të vëllait të tij.
Në një intervistë për Dosja.al, Salianji shprehet se ndër miqtë që ka në PD janë Grida Duma, Luan Baçi, Luçiano Boçi dhe Endri Hasa.
Zoti Salianji pasi ju nxorrët përgjimet, ndaj vëllait tuaj ka pasur edhe akuza. A ka probleme vëllai juaj me drejtësinë? A ka ndryshuar emrin?
Janë shpifje të tmerrshme. Sa herë që unë kam qenë në aktivitet kanë prodhuar edhe akuza të tjera të pabaza për mua, për persona që unë nuk i njoh. Për çdo problem që ka çdo person i rrethit tim familjar, nëse do të kisht, qeveria bashkë me institucionet e tjera në kurriz do të kishte marrë masat. Unë nuk kam mundësi t’i ofroj mbrojtje asnjë familjari tim, qoftë i largët apo i afërm. Nëse do të isha ministër dhe një afërm i imi do të kishte probleme me ligjin do të isha i pari që do të merrte dënimin me ashpërsinë maksimale. Në dijeninë time të plotë nuk ka asnjë familjar i imi që ka probleme me ligjin.
Çfarë marrëdhënie keni me vëllain tuaj, për të cilin janë ngritur edhe akuzat?
Këto janë gjëra personale, nuk besoj se i interesojnë publikut. Vihet në qendër të vëmendjes sesi jetohet jeta e gjithsecili në privat, nuk besoj se do t’i bëj ndonjëherë publike. Ai është në jetën e tij, në punën e tij, me familjen e tij dhe me fëmijët e tij. Nuk jeton këtu, është emigrant, është tërësisht në punën e tij.
Cili është politikania apo politikani nga radhët e PD-së që ju keni më shumë miqësi?
Unë kam shumë miqësi dhe jam një prej njerëzve që i mbaj miqësitë në parti. Kam shumë. Shpesh unë për shembull, kam ndarë mendim, kam qëndruar apo rri me Grida Dumën.
Ju po thoni që keni miqësi më të ngushtë me Grida Dumën?
Edhe me shumë të tjerë në fakt me Endri Hasën për shkak se ne kemi qëndruar edhe me deputët që kanë hyrë për herë të parë në parlament, kemi qenë në aktivitete të përbashkëta. Me Luan Bacin po ashtu, Luçiano Bocin.
Ju jeni akuzuar se keni biznese me deputetin e PS-së Sadri Abazin. Si janë marrëdhëniet tuaja me të?
Ka shumë akuza të stisura tashmë, të trilluara. Marrëdhënia ime me atë është zero, nuk kam asnjë marrëdhënie me të jo vetëm biznesi. Por kam kontakte se e kam në lagje. Jo s’kam miqësi me të. Me njerëz që rrinë në të njëjtat ambiente kur kalon i jep edhe dorën, këto janë norma të mirësjelljes. Unë besoj se është një prej deputetëve ka përfituar më shumë sesa ka merituar nga sistemi dhe një prej deputetëve që ka devijuar vullnetin e qytetarëve për interes të Ramës.
Zoti Abazi përflitet se është në grupin e kundërshtarëve të Veliajt në PS. A ju ka ofruar ndonjëherë dokumente kundër tij?
Nuk është se kam këtë lloj miqësie dhe këtë lloj besimi dhe as nuk e di që është kundër apo pro. Por shoh që të gjithë ndërtuesve i shkojnë fjollë punët me kryetarin e Bashkisë sepse lejet e ndërtimit dhe kullat janë shumë më shumë sesa pemët tani në Tiranë, më shumë sesa gjethet dhe bari.
