Në një intervistë për Evening Standard, Ora tregoi se prindërit e saj lanë gjithçka pas për të siguruar një të ardhme të sigurt në Mbretërinë e Bashkuar.
“Kur prindërit e mi ikën nga Kosova për të shpëtuar nga përndjekja ndaj shqiptarëve, ata rindërtuan jetën nga e para.
Nëna ime, që ishte psikiatre në Kosovë, duhej të mësonte anglishten dhe të ri-specializohej, ndërsa babai im punonte netëve të gjata për të siguruar jetesën tonë,” tha Rita. Ajo shtoi se muzika u bë një mbështetje e rëndësishme gjatë rritjes së saj.
Rita Ora është pjesë e fushatës dimërore të Evening Standard, e cila synon të mbështesë refugjatët, personat pa strehë dhe ata me pasiguri ushqimore në Londër. Fushata mbështetet edhe nga organizata Comic Relief, e cila ka dhuruar 500,000 £ për nismën.
Këngëtarja theksoi gjithashtu rëndësinë e mikpritjes dhe solidaritetit: “Njerëzit që na mirëpritën na bënë të ndihemi të pranuar dhe pjesë e diçkaje më të madhe. Kjo më mësoi se pjesëmarrja në komunitet kërkon dhembshuri dhe hapje ndaj të tjerëve.”
