Policia në Vlorë ka arrestuar dy autorët e plagosjes së 39-vjeçarit, Vladimir Krsmanovic, banues në Mal të Zi.
Bëhet fjalë për Damjan Selimaj dhe Geraldo Prenci, të cilët pas një konflikti për motive të dobëta kanë goditur me thikë malazezin në zonën e “Ujit të Ftohtë” në Vlorë, i cili ndodhet në spital nën kujdesin e mjekëve.
Policia bën me dije se dy autorët u arrestuan për veprën penale “Plagosje e rëndë me dashje”, kryer në bashkëpunim.
“Specialistët për Hetimin e Krimeve kundër Personit në DVP Vlorë, në vijim të veprimeve hetimore të kryera për dokumentimin e plotë të ngjarjes së ndodhur më datë 15.11.2025, arrestuan për veprën penale “Plagosje e rëndë me dashje”, kryer në bashkëpunim, shtetasit: D. S., 23 vjeç, dhe G. P., 26 vjeç, banues në Vlorë.
Nga veprimet hetimore rezultoi se rreth orës 04:30, në lagjen “Uji i Ftohtë”, në rrugën “Dhimitër Konomi”, gjatë një konflikti për motive të dobëta, këta 2 shtetas kanë plagosur rëndë me mjet prerës (thikë) shtetasin V. K., 39 vjeç, banues në Mal të Zi, duke e goditur në pjesë të ndryshme të trupit”,– thuhet në njoftimin e Policisë.
Materialet u referuan në Prokurorinë pranë Gjykatës së Shkallës së Parë të Juridiksionit të Përgjithshëm Vlorë.
