Demokracia nuk është vetëm procedurë. Demokracia është edhe thelb dhe fakti që ne krijojmë mundësinë për një marrëveshje të ardhshme për rregullat e lojës, qoftë me opozitën parlamentare, por edhe opozitën politike besoj se është shprehja më e lartë e ndërgjegjësimit që ka PS për fatet e demokracisë dhe fatet e Shqipërisë.
Kështu u shpreh ish-ministri i Jashtëm, Ditmir Bushati në fjalën e mbajtur në Kuvend.
“Këtu ka burra dhe gra që kanë hyrë në këtë sallë që nga viti 1991. Ishin socialistët dhe progresistët e këtij vendi që ndërtuan një sistem të ri nga hiri i 1997.
Nuk fillon 10 vjetori i anëtarësimit në NATO me gjeneratën time politike, nuk fillon me ne këtu, por nis me ata që u dënuan burgjeve në kohën e diktaturës, me studentët e dhjetorit që thërrisnin “E duam Shqipërinë si gjithë Europa’.
Sot ne duhet të pyesim dhe të gjejmë arsyen pse 13 vjet nga marrëveshja e 2006 me BE-në ne jemi këtu ku jemi.
Sot është dita për të shprehur mirënjohjen ndaj shërbimit diplomatik shqiptar dhe Forcave të Armatosura, ku ka burra dhe gra që shërbyen me përkushtim për Shqipërinë anëtare të NATO-s.
Ne jemi në një udhëkryq të madh. Si ka mundësi kur grekët dhe maqedonasit gjejnë gjuhën e përbashkët dhe ecin përpara, unë kam një pyetje për Ruçin dhe Majkon, pse ne sot nuk e gjejmë dot gjuhën këtu, a jemi të gjithë shqiptarë?
Njerëzit e dëshpëruar u larguan nga ky vend sepse e panë që pasuria u grumbullua në një grup njerëzish. Po këtyre që sot janë 30 vjeç sot çfarë t’i themi? Është momenti i fundit që të shohim nga e ardhmja dhe mos bëhemi nostalgjikë të së shkuarës”, tha Bushati.
Çfarë tha Ditmir Bushati në Kuvend
Politika shqiptare, për herë të parë është në një situatë të paprecedentë. Jemi gjetur shpesh në rrethrrotullime, por për herë të parë dy parti parlamentare kanë dorëzuar mandatet. Kjo është e paprecedentë jo vetëm për shtete të Ballkanit, por edhe për regjime despotike si të Venezuelës….
Nuk duhet të mohojmë faktin se boja, mielli kanë dalë në rrugë dhe janë drejtuar gabimisht drejt policisë.
Duke dalë nga Parlamenti opozita ka dëshmuar një llojë frike dhe kapitullimi, por kjo nuk mund të na bëjë ne të jemi arrogantë. Kjo nuk mund të na bëjë ne të shpenzojmë orë të tëra duke u marrë me protestat e opozitës.
Ne nuk mund të biem në kurthin e profecisë vetëpërmbushëse. Ne jemi Partia Socialiste, demokratë progresistë, ne duam të ndërtojmë një shoqëri më të mirë, për fëmijët anë dhe për fëmijët e opozitës që nuk janë në sallë. Kjo është arsyeja pse e mbështes propozimin e Damian Gjiknurit për të dhënë më shumë hapësirë në reformën zgjedhore.
Sepse unë nuk e konceptojë demokracinë si procedurë. Demokracia procedurë është zëvendësimi i formal i listës së PD dhe LSI, por demokracia është dhe thelb dhe fakti që ne krijojmë mundësinë për një marrëveshje të ardhshme për rregullat e lojës, qoftë me opozitën parlamentare, por edhe opozitën politike besoj se është shprehja më e lartë e ndërgjegjësimit që ka PS për fatet e demokracisë dhe fatet e Shqipërisë…’.
