Niko Peleshi, ish-ministër i Bujqësisë dhe deputet i PS-së, shprehet se socialistët nuk janë të lumtur dhe as të kënaqur nëse zgjedhjet e ardhshme do të bëhen pa opozitën.
Në këtë kuadër, Peleshi në studion e ABCnews, thekson se PS është e hapur për bisedime konstruktive me opozitën, duke e cilësuar këtë si një qëndrim të socialistëve që nuk kanë qenë kundër dialogut.
Por ky qëndrim i Peleshit duket se është krejt i ndryshëm nga ministrat aktualë të Ramës, që shprehen mëse të lumtur që në zgjedhje nuk do të kenë përfaqësues të opozitës.
“Ftesat apo gadishmëria për të zhvilluar diskutim me opozitën shqiptare është artikuluar nga kreu i Partisë Socialiste.
Në fakt ka të bëjë me kulturën dhe sjelljen e PS-së, e cila nuk ka qenë ndonjëherë kundër dialogut.
Ata thonë se kanë dalë në rrugë për ndershmërinë e zgjedhjeve, por zgjedhjet kanë qenë të vlefshme sepse u pranuan edhe nga ata.
Shpresoj që ky të jetë një shans për t’u ulur dhe për të diskutuar në mënyrë konstruktive dhe jodekonstruktive.
Ne nuk jemi të lumtur nëse do të detyroheshim të shkonim të vetëm në zgjdhje pa kundërshtarin tonë, opozitën.
Padyshim që të shkojmë në zgjedhje pa kundërshtarin, do të ishin ca zgjedhje që nuk do të na kënaqnin.
Opozita na ka habitur të gjithëve, edhe ndërkombëtarët të cilët nuk kanë shprehur mbështetje për këtë vendim.
Nuk e kemi të drejtën as ne, as PD-ja që të marrim peng procesin. Që t’u themi qytetarëve që nuk do të marrim pjesë në zgjedhje.
Ajo që shohim nuk duket si një tërheqje nga ana e opozitës. Nga ana e PS-së ka një frymë pozitiviste. Kaq kemi ne në dorë”, u shpreh Peleshi.
