Nga Boldnews.al
Krimi ka goditur sërisht Shkodrën ditën e sotme, ndërsa policia ka mbajtur shënim viktimën e 10 dhe të 11 në 8 muajt e fundit.
Shkodra, referuar ngjarjeve kriminale, ndoshta ka hyrë në një garë me Vlorën, ose anasjelltas, duke pasur numrin më të lartë të ekzekutimeve dhe vrasjeve në pritë, në muajt e fundit.
Në Shkodër krimi ka goditur plot 11 herë, duke marrë 11 jetë njerëzish, por duke shkaktuar frikë e panik te mijëra të tjerë që kanë mbetur ose kanë zgjedhur të jetojnë në këtë qytet.
Situata bëhet më e frikshme kur shikon statistikat e policisë: 11 vrasje, autorët 0.
Duket si një ndeshje futbolli ku përballë janë mbledhur futbollistët më të mirë dhe përballë kanë ekipin e amatorëve.
Në këtë rast, fatkeqësisht, amatorët janë ata që kanë për detyrë të mbrojnë qytetarët, të garantojnë rend e siguri, të mbrojnë jetët e njerëzve, të parandalojnë krimin dhe goditjet e tij.
Fatkeqësisht amatorët janë në pozicione drejtuese, që kënaqen me duartrokitjet në sallat e mbyllura apo në mitingjet e kontrolluara, që urdhërojnë përmes rrjeteve sociale apo Whats’app dhe që gjithçka u duket se shkon vaj.
Para disa muajsh, Sandër Lleshaj, kur u emërua zv.ministër i Brendshëm, zhvilloi një vizitë në Shkodër. Takoi drejtuesit lokalë të policisë, shoqërohej nga drejtuesit më të lartë të Policisë së Shtetit, dhe në një takim me dyer të mbyllura, thuhet se la disa porosi apo udhëzime. Ajo që publikoi media ishte që Lleshaj kishte kërkuar zbardhjen e ngjarjeve kriminale.
Sot Lleshaj ndodhet prapë në Shkodër, në të njëjtën godinë, me të njëjtët njerëz që drejtojnë policinë, por me më shumë viktima mes qytetarëve.
Bilanci është thelluar, krimi ka goditur plot 11 herë dhe policia, pokuroria, dhe çdo agjensi ligjzbatuese e varur ose e pavarur, nuk ka arritur të godasë qoftë edhe 1 herë.
Krimi ka mundur të ruajë të paprekur “rrjetën”, viktimat mund të shtohen dhe amatorët do të vijojnë të mbajnë shënim shifrat.
