Ka përfunduar protesta disa orëshe e opozitës, ndërsa kreu demokrat Lulzim Basha, i shoqëruar nga mijëra mbështetës të PD-së është rikthyer në selinë e partisë më të madhe opozitës.
Nën thirrjet “E duam Shqipërinë si gjithë Europa”, “Azem Azem ti je gjallë” dhe ‘Rama ik’, kreu demokrat tha se dita e sotme hyri në histori si dita e bashkimit më të madh kombëtar.
“Çdo shqiptar sot ju ka një borxh të madh juve misionarëve të lirisë, demokracisë, Shqipërisë si gjithë Europa”, tha kreu demokrat.
Në vijim, Basha theksoi se kufoma politike e Edi Ramës dhe klikës së tij kriminale, përshkallëzoi dhunën e paprovokuar ndaj protestuesve me qëllim që ti shpërndante nga rruga e protestës, por përgjigjen e mori nga populli.
“Duart e gjata të krimit që sot hodhën gaz dhe dëmtuan baballarët, nenat dhe fëmijët tonë, do të japin llogari para ligjit dhe për këtë zotohem para jush dhe para shqiptarëve.
Dita kur politikanët e bërë njësh me krimin po afron që të japing llogari para drejtësisë”, tha Basha.
Sipas tij, ne do ta hedhim në lumë qeverinë dhe parlamentin e krimit, rrugën kriminale të Edi Ramës.
“Nuk ka rrugë tjetër për të mbrojtur të drejtat tona sesa protestat popullore.
16 shkurti i hapi rrugën marshimit popullor dhe do të vazhdojë dita ditës.
Ishim shumë më 16 shkurt, por sot më 16 mars ishim shumë më shumë.
Miqve tanë ndërkombëtar po i u them se nuk ka stabilitet pa demokraci, nuk ka stabilitet pa qenë të gjithë të barabartë para ligjit.
Mos dëgjoni autokratin, por dëgjoni zërin e qytetarëve”, tha Basha.
Në vijim ai shtoi se Edi Rama kishte vënë bast se protesta sot do të ishte më e vogël se ajo e 16 shkurtit, por e humbi bastin dhe u fsheh si një mi në tunelet e byrosë në Poliçan.
