Policia e Tiranës i ka refuzuar lejen 48 orëshe partive të opozitës për të protestuar, ndërsa ka dhënë një leje që protesta që pritet të nisë në orën 11:00 të zgjasë deri në mesnatë, ora 00:00.
Opozita kishte kërkuar leje për zgjatjen e protestës 48 orë, ndërsa një kërkesë e tillë është refuzuar nga forcat e rendit.
Gjithsesi drejtues të partive opozitare kanë deklaruar se detajet e protestës do të përcaktohen nga qytetarët. Nëse ata do të vendosin që protesta të zgjasë dhe të qëndrojnë në boulevard, drejtues të partive të opozitës dhe ish-deputetë të këtyre partive do t’i binden vendimit.
Policia nga ana e saj ka angazhuar mbi 1200 forca policore, përfshi këtu edhe repartet special, RENEA, FNSH si dhe Shqiponjat, që kanë kaluar në gadishmëri prej mbrëmjes së të premtes.
Në kuadrin e masave, e gjithë zona nga ish-piramida deri te Kryeministria është rrethuar me gardhe, ndërsa forcat policore, kryesisht ato speciale do të jenë të pozicionuara në pjesën e pasme të Kryeministrisë, si dhe në pjesët anësore të godinës. Në mbështetje të tyre janë edhe mjete të blinduara si dhe makinat që shpërndajnë protestuesit me ujë.
Ndërkohë në hyrjen qendrore të Kryeministrisë është hequr skela mbrojtëse.
Ndërkohë rrugët që lidhen me Kryeministrinë janë bllokuar nga policia, duke mos lejuar qarkullimin e mjeteve.
Gjithashtu policia po kontrollon automjetet që kalojnë në bulevard, madje duke mbajtur shënim targat e mjeteve.
