Nga Boldnews.al
Erion Veliaj nuk e ka ende të qartë nëse do të jetë kandidat për kryetarin e Bashkisë së Tiranës në zgjedhjet lokale të qershorit. Megjithatë, ai po mendon që tani që t’u japë fonde publike për vitet e ardhshme kompanive që kanë bashkëpunuar ngushtë me të.
Në një tender të zhvilluar së fundmi, Bashkia e Tiranës ka shpallur fitues kompaninë “Prosound”. Kjo kompani private, e specializuar në tregun e fonisë, do të marrë nga Bashkia e Tiranës 45 milionë lekë të reja në tre vitet e ardhshme.
“Prosound”, e cila njihet edhe si kompania që “i jep zë” propagandës së Erion Veliajt, është një prej bashkëpunëtorëve më të ngushta të Veliajt.
Të dhënat e portalit “spendingdata.al” tregojnë se “Prosound” ka fituar rreth 23 milionë lekë të reja gjatë periudhës 2015-2018 vetëm nga Bashkia e Tiranës.
Pagesa e parë që ka marrë kjo kompania nga Bashkia e kryeqytetit daton në Nëntor 2015, vetëm pak muaj pasi drejtimin e mori Erion Veliaj. Më pas, “Prosound” ka përfituar disa dhjetra pagesa gjatë mandatit të “Lali Erit”, shuma e të cilave arrin në rreth 200 mijë euro.
Pas këtij bashkëpunimit të frytshëm, Erion Veliaj e ka shpallur kompaninë e fonisë fituese të tenderit edhe për 3 vitet e ardhshme. Shuma që do të shkojë në llogaritë e “Prosound” për periudhën 2019-2021 është 45 milionë lekë të reja.
Bashkia e Tiranës, në Janar 2019, ka zhvilluar tenderin për “Blerje aktivitete të ndryshme për Bashkinë e Tiranës për periudhën 2019-2021”.
Në këtë tender kanë paraqitur oferta vetëm “Prosound”, në bashkëpunim me një kompani tjetër, “Dixhi Print”. Tenderi ka qenë i thjeshtë, pasi nuk ka pasur rivalitet. Në përfundim, Bashkia e Tiranës shpall fitues “Prosound” dhe “Dixhi Print”.
Në periudhën e mëparshme, “Prosound” ka sguruar foninë për aktivitetet që përmbushin maninë e Lali Erit për të shfrytëzuar fondet publike, me qëllim kurimin e imazhit të tij.
Në javët e para të vitit 2019, “Prosound” është paguar për aktivitete si “drekë Krishtlindje për mensën sociale në Kombinat” apo për “dëgjesa publike”, të cilat në fakt kanë qenë thjesht dhe vetëm takime me militantët e Partisë Socialiste dhe në funksion të fushatës së tij të parakohshme për kryetar Bashkie.
Si “shpërblim” për sigurimin e një shërbimi cilësor për realizimin e propagandës së tij, Lali Eri i jep “ministrisë së tij të zërit” tenderin për tre vitet e ardhshme.
Do të jetë apo jo Erion Veliaj kryetar Bashkie i Tiranës, kjo nuk do e pengojë “Prosound” që të jetë kontraktori i vetëm për realizimin e shërbimit të fonisë në aktivitetet e institucionit më të rëndësishëm të pushtetit lokal në Shqipëri.
