Opozita e bashkua përmbylli vendimin për djegien e mandateve të deputetëve, ndërsa një ditë më parë kreu demokrat, Lulzim Basha, paralajmëroi një vendim të tillë.
Gjatë ditës së sotme, Kryeministri Edi Rama e quajti një bllof vendimin e PD-së, duke mbajtur shpresë deri në orët e pasdites se LSI nuk do e mbështeste.
Dukej se Rama priste një vendim surprizë nga LSI, ndoshta referuar deklarimeve të drejtuesve të saj, se mandatet e kësaj force politike janë mandate gjaku.
Një pjesë e mediave, pranë qeverisë, gjatë ditës së sotme aluduan se të paktën 6 ligjvënës të partisë së drejtuar nga Monika Kryemadhi, kishin kundërshtuar vendimin për djegien e mandateve, duke hedhur në opinionin publik idenë se PD dhe aleatët e saj tradicionalë, nuk do të mbështeteshin nga LSI, parti e spektrit të majtë që ka bashkëqeverisur qoftë me PD ashtu edhe me Ramën, me nga një mandat qeverisës.
E gjithë kjo situatë, që nisi në orët e paradites nga Rama dhe vijoi me mediat, krijoi idenë se Kryeministri shpresonte në një vendim tjetër nga LSI, ndoshta duke e parë si një gomone politike.
Por vendimi përfundimtar i LSI-së, duke ndjekur atë PD-së dhe aleatëve të saj, shuajti çdo dilemë lidhur me mandatet e deputetëve të opozitës.
Për herë të parë në 28 vitet e pluralizmit, politika shqiptare do të përballet me djegie mandatesh deputetësh, që pavarësisht se parashikohet në ligjin zgjedhor apo Kushtetutë, nuk është aplikuar kurrë më parë.
Historia politike ka treguar në të paktën dy raste (1991 dhe 1996) se kur opozitat qëndrojnë jashtë Kuvendit dhe mazhorancat bëhen mospërfillëse, ngjarjet që pasojnë janë përplasje dhe zgjedhje të parakohshme. /Boldnews.al/
