Një efektiv i policisë Kufitare Vlore është arrestuar për korrupsion pasiv. Bledar Shele është vënë në pranga nga SHÇBA pasi dyshohet se i kërkoi 100 euro një personi për të lejuar të vijonte udhëtimin drejt Italisë, duke pretenduar se nuk përmbushte tërësisht kushtet e kalimit të lirë ne zonën “Shengen”.
Aksioni
Në kuadër të operacionit “Blue border”, Shërbimi për Çështjet e Brendshme dhe Ankesat, në bashkëpunim me Prokurorinë e Rrethit Gjyqësor Vlore kanë goditur një rast të korrupsionit pasiv.
SHÇBA kishte regjistruar procedimin penal në Prokurori mbi bazën e informacioneve që kishte siguruar me herët.
Pas një hetimi me metoda speciale u bë e mundur të dokumentohej ky aktivitet pasditen e sotme.
Strukturat e SHÇBA kanë arrestuar në flagrancë Bledar Shelen, 39 vjeç, me detyre kontrollor në Stacionin e Policisë Kufitare në Portin e Vlorës.
Efektivi i pikës së kalimit kufitar dyshohet se i kërkoi 100 euro një shtetasi për të lejuar të vijonte udhëtimin drejt Italisë, duke pretenduar se nuk përmbushte tërësisht kushtet e kalimit të lirë në zonën “Shengen”.
Gjatë arrestimit në flagrancë, të ndaluarit iu sekuestruan sasia prej 100 eurosh në cilësinë e provës materiale.
