Në parlament pothuajse nuk i dëgjohet zëri fare, por kjo video tregon anën e kundër të deputetit socialist Sadri Abazi.
Gjatë pjesëmarrjes në mitingun përmbyllës të ASHE për zgjedhjet në Dibër, deputeti socialist ka shpërthyer në të ulëritura duke kërkuar votën për Muharrem Ramën. Sadriu është përpjekur të artikulojë disa fjalë por e bërtitura i ka marrë zërin në disa momente duke i bllokuar kështu edhe mendimet.
Edi Rama vërtet ka humbur një kryebashkiak si Shukri Xhelili në Dibër, por ama ka fituar një orator special mitingjesh elektorale si deputeti Sadri Abazi. Fjalimi i tij u dallua mbi të tjerët, madje la në hije edhe atë të vetë Ramës, për nga ekspresiviteti, metaforat e goditura dhe pasioni i zjarrtë.
Diçka tjetër që ra në sy të ekspertëve të komunikimit, ishte gjestikulacioni i rrallë me të cilin deputeti Sadri Abazi shoqëronte fjalimin e tij përpara dibranëve. Një performancë origjinale, që ndoshta nesër edhe shumë deputetë të tjerë do të kërkojnë ta bëjnë të tyren.
Boldnews.al
