Tendenca e qeverisë për të dhënë me konçesion shërbimet publike vijon ende. Sëfundmi Ministria e Tranporteve dhe Infrastrukturës bën me dije se sektori i ujësjellës-kanalizimeve do t’i nënshtrohet një Parteneriteti Privat Publik (PPP) për të përmirësuar shërbimin ndaj qytetarëve.
“Ne e inkurajojmë angazhimin e këtij lloj partneriteti publik dhe privat pasi për ne e rëndësishme është që shërbimi ndaj qytetarëve të jetë cilësor. Ky është objektivi madhor dhe nuk kemi asnjë paragjykim në formën se si ofrohet ky lloj shërbimi”.– deklaron Ministri i Transporteve, Edmond Haxhinasto.
Sipas Ministrit Haxhinasto, konçesionimi ose i ashtuquajturi (PPP) i ujësjellës-kanalizimit, do të përmirësojë furnizimin me ujë të pijshëm, rrit nivelin e arkëtimeve dhe do të eleminojë lidhjet e paligjshme.
“Humbjet janë shumë të mëdhaja në rrjet dhe reduktimi i këtyre humbjeve do të sillte një situatë krejtësisht tjetër në mënyrën si shërbehen qytetarët, duke rritur kohën e shërbimit ndaj tyre që sot si mesatare republike është 12 orë por dhe cilësinë e ujit dhe ketë e theksoj në mënyrë të jashtëzakonshme sepse ka nevojë për një vëmendje shumë më të madhe përsa i takon sasisë së ujit që i shërbehet qytetarëve”.– shton më tej Haxhinasto.
Burime për Boldnews.al konfirmojnë se një nga emrat që synon të futet në garën për këtë konçesion pritet të jetë edhe ish drejtori i UKT Neritan Gjojdeshi, i njohur për lidhjet e tij të afërta me deputetin socialist Koço Kokëdhimën.
