Katër prej vendimeve të sotme të qeverisë kanë të bëjnë me pronat e ushtrisë. Këto prona i kalohen nën administrim ose në pronësi institucioneve të tjera. Pas uljes së buxhetit për Forcat e Armatosura nën 1% të të Produktit të Brendshëm Bruto kjo është një tjetër politikë agresive e qeverisë ndaj FA-ve të Republikës së Shqipërisë, pjesë e Aleancës së Atlantikut të Veriut.
Kështu qeveria vendosi sot kalimin në përgjegjësi administrimi, nga Ministria e Mbrojtjes tek Radio Televizioni Shqiptar, të sipërfaqes truall funksional, prej 1 500 (një mijë e pesëqind) m², brenda territorit të pronës nr.188, me emërtim “Bateri PZ”, me vendndodhje në Sauk, Tiranë, për ta përdorur për ndërtimin e një stacioni transmetimi, në shërbim të rrjetit numerik të transmetimit DVB-T2, të Radio Televizionit Shqiptar.
Qeveria gjithashtu vendosi kalimin në përgjegjësi administrimi nga Ministria e Mbrojtjes te Ministria e Kulturës, të pronës nr.186, me emërtim “Reparti Ushtarak nr.3042, Qendër Stërvitore”, me vendndodhje në Sauk, Tiranë, për ta përdorur për ndërtimin e “Qendrës së Artit dhe të Zejeve”.
Po kështu qeveria vendosi ndryshimin e përgjegjësisë së administrimit, nga Ministria e Mbrojtjes te Ministria e Transportit dhe Infrastrukturës, për Autoritetin Rrugor Shqiptar, të sipërfaqes truall funksional, prej 260 (dyqind e gjashtëdhjetë) m², brenda territorit të pronës nr.1137, me emërtim “Heliodromi i Repartit Ushtarak nr.3340”, me vendndodhje në Farkë, Tiranë, për ta përdorur për ndërtimin e segmentit rrugor “Pjesa verilindore, kthesa Sauku – Bregu i Lumit, Unaza e Jashtme e Tiranës”.
Ndërsa Ish-Brigadën e Tankeve në Gërdec, Vorë, me numër 126 qeveria vendosi ta kalojë në pronësi, nga Ministria e Mbrojtjes te Bashkia Vorë, për ta përdorur për ushtrimin e funksioneve të veta administrative, për përmirësimin e infrastrukturës dhe ofrimin e shërbimeve sociale vendore, krijimin e ambienteve kulturore, sportive, argëtuese e çlodhëse për komunitetin, në territorin juridiksional të Bashkisë Vorë.
(Boldnews)
