Është zbardhur dinamika e plagosjes me armë zjarri e 11-vjeçarit në fshatin Gjegjan të Pukës. Policia e Shtetit bën me dije se ai ka mbetur i plagosur nga një 17-vjeçar, i cili është shpallur në kërkim.
I mituri ndodhej në ambientet e lokalit të babait të tij në momentin që ndodhi ngjarja. Autori ka hyrë në lokal për të gjetur kushëririn e 11-vjeçarit me të cilin kishte konflikte të mëparshme.
Në momentin që nuk e ka gjetur atë ka qëlluar me armë ndaj të miturit duke e plagosur në këmbë.
11-vjeçari u dërgua fillimisht në spitalin e Pukës, por më pas u nis me helikopter drejt Tiranës për të marrë trajtim të specializuar.
Policia ka bërë të mundur identifikimin e autorit dhe po vijon punën për kapjen e tij.
“Rreth orës 16:20, në fshatin “Dom Gjegjan”, Pukë, në rrethana ende të paqarta është plagosur me armë zjarri, një i mitur 11 vjeç, i cili po dërgohet në Spitalin e Traumës Tiranë.
Falë veprimeve të shpejta hetimore është bërë identifikimi i autorit të dyshuar të ngjarjes, shtetasi R. C. 17 vjeç dhe po punohet për kapjen e tij”, bën me dije policia.
