Deputetja e PS, Mimoza Hafizi konteston referendumin që parashikohet të zhvillojnë socialistët në 9 Prill.
Nëpërmjet një letre të dërguar Komisionit të Garancive Statutore, Hafizi deklaron se procedurat që u ndoqën në Kongres i bëjnë të pavlefshme ndryshimet në Statut dhe vetë referendumin, i cili nuk ishte parashikuar në rendin e ditës. (Shkarko letrën e siguruar nga Boldnews.al)
Deputetja shkodrane arsyeton se nisma për referendum nuk mund të merrej thjesht nga Edi Rama, por duhej të vendosej në Asamble. Sipas saj nuk pati edhe asnjë akt, projektvendim konkret, mbi të cilën Kongresi, delegatët e tij, të mund të diskutonin dhe të vendosin për miratimin ose jo të përmbajtjes së tij.
“Ndryshimet në statut duhej të ishin votuar nen për nen në Kongres, ndërsa pyetja duhej të ishte vendosur po ashtu nga Kongresi.”– vazhdon me argumentat e saj Hafizi, e cila kërkon mbledhje të menjëhershme të Komisionit të Garancive Statutore.
