Nga Boldnews.al
Në ditën e dytë të qëndrimit në qeli, Saimir Tahiri ka pasur kohë të mjaftueshme të mendohet dhe kuptojë se nga kush i erdhi. Edhe vetë e di se është një nga viktimat e pushtetit, jo si një i pafajshëm që u dënua padrejtësisht, por si fajtor si gjithë të tjerët në Rilindje. Po pse pikërisht unë? Kjo do jetë pyetja që Tahiri ia bën vetes, duke pasur edhe përgjigjen gati. Ai duhej të dënohej në këto momente.
Dikush e kërkon si statistikë për dy arsye. Së pari nevojitet imazhi sikur drejtësia e re po funksionon dhe së dyti me dënimin e tij, rivali për numër dy në parti, si pasardhës i Ramës saldoi edhe më shumë testikujt, me të cilat mburret se i ka prej hekuri.
Drejtësia sot mburret me dënimin e ish-ve, që edhe ata nuk janë as sa gishti i njërës dorë. Dy njerëzve u duhej më shumë se kurrë “karta drejtësi” në duar, për ta shpërndarë si triumfin më të madh, pikërisht atëherë kur shumica e qytetarëve mendojnë se është dështimi më i madh. Gati në sinkronë, ambasadorja amerikane Yuri Kim dhe Edi Rama reaguan për dënimin e Tahirit. E para theksoi se “askush nuk është mbi ligjin”, duke përgëzuar drejtësinë për vendimin e marrë, ndërsa Rama dha një përgjigje të shkurtër që ajo që ndodhi është investimi në reformën në drejtësi.
Që të dy e dënuan Tahirin më shumë ngase e dënoi një drejtësi që edhe kur nuk merr urdhra të drejtpërdrejta di të “lexojë nën rreshta” deklaratat e dy të “mëdhenjve”, Edi Rama dhe Yuri Kim. Ambasadorja është në fundin e përfundimit të mandatit dhe për të mos dalë tërësisht bosh nga “investimi” për reformën në drejtësi, do të marrë me vete si triumf dënimin e një ish-ministri si Saimir Tahiri dhe gjithashtu edhe të ish-it tjetër të Ramës, Lefter Koka.
Nga ana tjetër, drejtësia e “kastruar” nga pushteti, i ka bërë një nder të madh rivalit politik të Saimir Tahirit. Deri në vitin 2017, Tahiri dhe Veliaj cilësoheshin si “yjet në ngjitje” të një qeverisje haluçinative që nëpërmjet propagandës krijoi mitet e rreme të personazheve politik që do të trashëgonin Partinë Socialiste, gjithnjë nën hijen e rëndë të Ramës, që me apo prezencën e tij do ishte gjithnjë aty.
“Është ministri më i suksesshëm i qeverisë sime”-pati deklaruar Rama teksa shëtiste Tahirin deri në Uashington dhe mu bash e në zyrën Ovale. Vetë Tahiri e besoi pasi bëri një llogari të thjesht: Kanabizova vendin dhe i dhash pushtetin Ramës në zgjedhjet e vitit 2017. Me vete në atë kohë pati edhe ambasadorin që kërkoi peshk të madh, por asgjë nuk ra në grepin e tij, pasi peshkonte në pellgje me ujë të ndotur ku as bretkosa nuk gjendeshin. Ish-ambasadori amerikan dha deklaratën e fortë se ishte shkatërruar 99% e parcelave me kanabis, ndërsa Italia dhe Greqia, pikërisht nga kanabisi shqiptar kishte ngritur deri ushtrinë në këmbë.
Nga ana tjetër Rama i përkëdhelte kokën Tahirit për ta pompuar si ndër më të suksesshmin e kabinetit të tij, ndërsa sot e shiti me një status në FB, duke u shprehur se “nuk komentoj vendimet e drejtësisë së re”.
Nën ndikimin e parasë së pisët të drogës, e cila u zbraz në shitblerjen e votave, Tahiri priste shpërblimin, por i erdhi ndëshkimi politik.
Fituesi më i madh mbetet Erion Veliaj. Rivalin e tij në PS jo vetëm e zhduku nga politika, por i “arredoi” edhe qelinë e burgut ku sipas vendimit të gjykatës duhet të vuajë 3.4 vite dënim. Ky është momenti i Veliajt. Së pari feston shkatërrimin e rivalit dhe së dyti e ka të qartë se me burgosjen e Tahirit kjo “drejtësia e re” do të mburret për më shumë se një vit, duke lënë të livadhisin pa asnjë drojë të gjithë të përlyerit në aferën korruptive. Tahiri besoi verbërisht tek Rama dhe sot në qeli tymos cigare duke numëruar ditët e rënies së tij, ndërsa rivali Veliaj doli vërtetë me “topehekuri” sikurse e ka pohuar vetë së fundmi.
