Dita e Hënë pritet të jetë nën ndikim të kushteve atmosferike të paqëndrueshme. Moti parashikohet kryesisht i vranët. Reshje shiu priten që në orët e para të 24-orëshit me intensitet të ulët në pjesën më të madhe të vendit. Në mesditë e kryesisht pasdite, reshjet e shiut fitojnë intensitet mesatar, lokalisht reshje në formën e shtrëngatave.
Në orët e pasdites, në lartësinë mbi 300 metra në veri-verilindje dhe në lartësinë mbi 500 metra në lindje-juglindje, parashikohen reshje bore me intensitet deri mesatar. Kjo situatë do të mbetet prezente deri në orët e para të mëngjesit të ditës së Martë, sipas Shërbimit Meteorologjik Ushtarak.
Gjatë ditës së Martë e deri ditë e Premte, vendi ynë do të jetë nën ndikim të kushteve atmosferike të qëndrueshme. Orët me diell do të mbizotërojnë në pjesën më të madhe të territorit. Vranësira pritet të jenë pakta kryesisht përgjatë relieveve malore.
Era do të jetë nga kuadrati i veriut me shpejtësi mesatare 1-8m/sek, e cila hera-herës përgjatë vijës bregdetare dhe zonave luginore ditën e Martë dhe të Mërkurë, do të fitojë shpejtësi deri në 15-20m/sek.
