Gjykata e Lartë në Tiranë publikoi një vendim njësues në lidhje me përballjen e gazetarëve Andi Bushati dhe Armand Shkullaku me Prokurorinë dhe Gjykatat kundër vendimit për sekuestrimin e serverit të portalit të drejtuar prej tyre, lapsi.al.
Togat e zeza të Gjykatës së Lartë në këtë rast kanë vendosur mospranimin e rekursit të SPAK, që insistoi në kërkesën për sekuestrimin e kompjuterave të portalit që publikoi databazën e patronazhistëve gjatë fushatës për zgjedhjet parlamentare 25 prillit.
Në verdiktin që vjen pas një përballje të gjatë të gazetarëve me prokurorinë e posaçme SPAK dhe Gjykatën e Shkallës së Parë, thuhet se mjetet e punës së gazetarëve mund të këqyren, por duke vendosur detyrime shtesë për prokurorët dhe gjykatësit, të cilat në rastin konkret duket se nuk janë zbatuar.
Në rastet kur Gjykata vendos të marrë prova nga media, togat e zeza shprehen se duhet të arsyetohet përse sekuestrimi i të dhënave ose sistemeve kompjuterike është i domosdoshëm për zgjidhjen e çështjes.
Po kështu Gjykata duhet të përcaktojë ose të argumentojë se, cilat janë të dhënat ose sistemet kompjuterike që do t’i nënshtrohen sekuestrimit dhe çfarë synohet të provohet me këtë veprim.
Specifikisht lidhur me sekuestrimin e të dhënave ose sistemeve kompjuterike ndaj gazetarëve profesionistë, vendimi përcakton se Gjykata duhet të lejojë sekuestrimin, pasi të jetë shteruar kërkimi në të gjitha burimet e tjera të mundshme të të dhënave.
Kjo do të thotë se ndërhyrje të tilla, duhet të jenë të mirë-argumentuara dhe vetëm në rastet kur e dhëna nuk mund të merret në burimin e saj.
Në raste të tilla përjashtimore, Gjykata duhet të saktësojë të dhënat konkrete që kërkohet të sekuestrohen, përse ato janë të domosdoshme dhe përse sekuestrimi i tyre është i pamundur të realizohet në një mënyrë tjetër.
Gjykata e lartë shkruan në vendim se në çdo rast, duhet të tregohet kujdes për mos cenim të marrëdhënies së gazetarit me burimin e informacionit, duke shmangur zbulimin e këtij burimi kur vërtetësia e të dhënave mund të verifikohet në një mënyrë tjetër.
/Ora News/
