“Kuvendi i 11 dhjetorit do të jetë ringritja e Partisë Demokratike. Ky Kuvend do të demokratizojë si kurrë më parë këtë parti dhe do të vendosë rregulla. Ne nuk do të përjashtojmë askënd nga Partia Demokratike, ndaj edhe iu bëjmë thirrje çdo delegati dhe çdo deputeti të vijë në Kuvendin e 11 dhjetorit”, tha ish-Kryeministri Sali Berisha.
Në emisionin “Opinion”, Berisha tha se vendimi i Lulzim Bashës ishte i padrejtë, ndërsa u shpreh se ai humbi 4 palë zgjedhje dhe nuk dha dorëheqjen.
“Do të ndërmerrja këtë tur takimesh edhe nëse z. Basha nuk do të më largonte nga Grupi Parlamentar”, tha Berisha.
Ish-Kryeministri tha se selia e PD është pronë e Partisë Demokratike dhe jo e Lulzim Bashës.
“Basha mund të bëjë çfarë të dojë, mund të shkojë në Gjykatë, por selia e PD është pronë e Partisë Demokratike.
Më 11 dhjetor ne rithemelojmë PD, do të ngremë një komision që do të përfundojë punën e rithemelimit të partisë. Më 18 dhjetor nuk ka Kuvend, pasi Kryesia e PD që mori vendimin ka 21 anëtarë jo-legjitimë, pasi nuk janë votuar sikundër e kërkon statuti”, tha Berisha.
Ai u shpreh se delegatët e Kuvendit po ia refuzojnë formularët Lulzim Bashës.
