Nga Boldnews.al
Një grup nxënësish të shkollës “Jeronim De Rama” në Tiranë ishin këtë të Enjte vizitorët e veçantë në ambjentet e Gjykatës së Lartë.
Të rinjtë u njohën me historikun dhe aktivitetin e institucionit, në kuadër të “Ditës së Hapur”, një aktivitet që Gjykata e Lartë synon ta zhvillojë periodikisht me grupe të ndryshme shoqërore.
Ida Vodica, Drejtoresha e Marrëdhënieve me Publikun, deklaroi për median se “Këshilli i Gjykatës vendosi që e premtja e fundit e çdo muaji do të jetë Ditë e Hapur për të sjellë institucionin sa më pranë publikut, në kuadër të një gjykate transparente dhe miqësore”.
Nëpërmjet “Ditës së Hapur”, Gjykata e Lartë synon që të sigurojë aksesin e vizitave pranë saj të nxënësve të shkollave apo studentëve dhe, me pjesëmarrjen aktive të tyre, mund të organizohen edhe gjyqe imitues.
Gjykata e Lartë, për nga vetë pozicioni i saj kushtetues, është në krye të hierarkisë së sistemit të drejtësisë dhe hija e saj është e rëndë, kjo edhe për shkak se shumë gjëra prej vitesh aty kanë qenë ekskluzivitet i palëve në proces.
Për më shumë se një vit, Gjykata e Lartë ishte tërësisht jashtë funksionit, për shkak të mungesës së trupës gjyqësore.
Tashmë, megjithëse ende me vakanca të konsiderueshme, anëtarët aktualë të Gjykatës po mundohen të shqyrtojnë sa më shumë nga stoku gjigand i dosjeve prej më shumë se 35 mijë çështjesh.
Në ndihmë të gjyqtarëve gjenden edhe një trupë juristësh të rinj, të cilët janë angazhuar nëpërmjet USAID-it për të ndihmuar përgatitjen e dosjeve në aspektin administrativ, si edhe ndarjet e tyre sipas fushave përkatëse.
Reforma në Drejtësi, e miratuar në vitin 2016, synoi, ndër të tjera, krijimin e një sistemi gjyqësor sa më transparent.
Ky qëllim nuk duket se është arritur nga një pjesë e rëndësishme e strukturave të drejtësisë, përfshirë edhe ato që konsiderohen “të reja”.
Megjithatë, Gjykata e Lartë ka dëshmuar se e ka përthithur idenë e transparencës me publikun.
Tashmë, të gjithë vendimet gjyqësore, përfshirë edhe ato që merren në “Dhomë Këshillimi”, janë të aksesueshme për të interesuarit dhe publikun në faqen zyrtare të Gjykatës së Lartë.
Po ashtu, pavarësisht kufizimeve infrastrukturore të godinës dhe pandemisë së shkaktuar nga Covid-19, gjithnjë e më shumë publiku po merr pjesë në seancat e Gjykatës së Lartë.
Gjithësesi, përtej këtyre masave, sërish opinioni publik vijon të jetë skeptik mbi punën e gjyqësorit.
Për qytetarët, të cilës presin drejtësinë në Gjykatën e Lartë, shpresat për përfundim të shpejtë të çështjeve të tyra janë shumë të vakëta.
Stoku i dosjeve i bën shumë qytetarë pesimistë dhe, në të drejtën e tyre, kritikojnë gjyqësorin.
Për të zbutur sadopak skepticizmin e ligjshëm të qytetarëve, Gjykata e Lartë ka vendosur pikërisht për të qenë sa më transparente, nëpërmjet aktiviteteve si “Dita e Hapur”, nëpërmjet të cilës do të shpjegojë përpjekjet e saj në uljen e stokut dhe dhënien e drejtësisë.
Duket një sfidë e vështirë, megjithatë Gjykata e Lartë deklaron se ajo mund të përballohet me sukses nëpërmjet dialogut me qytetarët.
