Nënkryetarja e Partisë Demokratike, Jorida Tabaku, e ftuar në rubrikën “Opinion”, në “News 24”, ka folur për zhvillimet e fundit brenda Partisë Demokratike.
Sipas Tabakut, nuk do të ketë Kuvend Kombëtar me 11 Dhejtor, por me 18 Dhjetor ashtu siç u vendos në kryesinë.
Sipas saj, qëllimi i Kuvendit do të jetë se si do të vijohet me aksionin politik, duke qenë se jemi para zgjedhjeve lokale, si dhe shtoi se do të diskutohet për rifreskimin e strukturave.
“Ka qartazi një vendim të kryesisë për 18 dhjetorin. Kemi pasur një mbledhje të gjatë të kryesisë, prej 6 orësh, patëm shumë ide. Ndihem krenare kur diskutohet në një ambient me mendime të ndryshme. Por në fund u vendos që data e mbledhjes së Kuvendit Kombëtar të jetë 18 dhjetori. Çdo parti perëndimore, ka disa rregulla të funksionimit që është statuti i partisë. Aty pati diskutime edhe brenda propozimit të datës 18, të shtohen në rendin e ditës të gjitha çështjet që kërkonin anëtarët e kryesisë. Por njëkohësisht edhe për të diskutuar momentin që po kalon PD”, tha Tabaku.
Lidhur me firmat e depozituara nga ish-Kryeministri Berisha, Tabaku u shpreh se PD ka qenë duke pritur firmat, për të ndjekur procesin zyrtar, ligjor, të rregullt. “Me aq sa kam parë formularët, nuk shprehet vullneti për një datë, ata duan të mblidhet Kuvendi e ne kemi vendosur 18 dhjetor. Për të kaluar këtë situatë thërrasim të gjithë demokratët. Një vendim kryesie është i drejtë për të gjithë”, tha ajo.
