Nga Boldnews
Kryeministri Edi Rama, në “Shënimet e Javës”, zgjodhi të sulmojë opozitën dhe të flasë për integrimin europian, por shmangu me kujdes disa nga çështjet më të nxehta politike të ditëve të fundit.
Rama deklaroi se “molotovarët” e Tiranës u përpoqën të dëmtonin imazhin e Shqipërisë në arenën ndërkombëtare, duke i cilësuar protestat e opozitës si një “ofensivë energjie negative” për të bllokuar rrugën europiane të vendit.
Sipas tij, opozita “u lëshua rrugëve për ta djegur Shqipërinë në sytë e botës”, ndërsa akuzoi kundërshtarët politikë se shpërndanë “helm politik” në media dhe në kancelaritë europiane, duke kërkuar izolimin dhe ndëshkimin e Shqipërisë.
“Këta thanë se rruga europiane ishte bllokuar dhe se Shqipëria ishte izoluar. Por u gënjyen. Shqipëria fitoi sërish me dinjitet dhe krenari”, u shpreh Rama.
Kreu i qeverisë theksoi se më 26 maj, në Bruksel, Konferenca Ndërqeveritare Shqipëri–Bashkimi Europian do të shënojë mbylljen me sukses të fazës hyrëse dhe hapjen e fazës përfundimtare të negociatave për anëtarësimin e Shqipërisë në Bashkimi Europian.
Rama e mbylli mesazhin me një tone simbolike, duke deklaruar se Shqipëria do ta vendosë “flamurin e Skënderbeut dhe të Ismail Qemalit në oborrin e shtëpisë së madhe të Europës së Bashkuar”.
“Mbron” Ballukun, mohon korrupsionin
I pyetur për çështjen e Belinda Balluku, e cila është vënë nën hetim për shkelje të barazisë në procedurat e prokurimit publik, Rama minimizoi situatën dhe mohoi çdo lidhje me korrupsionin.
“Ky nuk është rast korrupsioni. Prokuroria nuk po e akuzon atë për korrupsion,” deklaroi Rama, duke e cilësuar çështjen “larg korrupsionit”, gjatë një intervistë për të përditshmen estoneze Postimees.
Po ashtu, ai mbrojti vendimin e mazhorancës për të mos mbështetur heqjen e imunitetit parlamentar të Ballukut, duke insistuar se hetimet mund të vazhdojnë edhe pa këtë masë.
Asnjë fjalë për deklaratat e Ferit Hoxhës
Në reagimin e tij, Rama nuk tha asnjë fjalë edhe për deklaratat e fundit të Ferit Hoxha, ku I quan shqiptarët e Maqedonisë, “idiot”, po ashtu dhe deklaratat për kampin e Gjadrit, të cilat kanë nxitur debat politik dhe mediatik gjatë ditëve të fundit.
Mirëpo padyshim ka urdhëruar që asnjë mos ta zërë karrigen e tij në Kuvend, packa se nuk shkon shpesh. Kujtojmë që në seancën e 14 majit, karrigia e kryeministrit Edi Rama në sallën e Kuvendit ka mbetur për pak çaste bosh gjatë seancës plenare, duke tërhequr vëmendje në sallë.
Gjatë këtij momenti, ministri i Jashtëm Ferit Hoxha është ulur përkohësisht në vendin e kryeministrit, ndërsa po bisedonte me zëvendëskryeministren Albana Koçiu.
Sipas burimeve nga Kuvendi, një punonjëse e Administratës ka ndërhyrë menjëherë, duke i kërkuar ministrit të largohej nga karrigia, me argumentin se ajo është e rezervuar vetëm për kreun e qeverisë.
Heshtje për mungesën në Kuvend
Kryeministri shmangu gjithashtu komentet për mosparaqitjen e tij në Kuvend, një çështje që është kritikuar fort nga opozita dhe deputetët gjatë seancave parlamentare.
Vlen të përmendim që janë kërkuar dhe interpelanca me kryeministrin.
Nuk përmend krizën në shëndetësi
Edhe pse në Kuvend janë ngritur akuza të forta për mungesat në sistemin shëndetësor, Rama nuk i preku fare këto problematika në komunikimin e tij publik.
Deputetë të opozitës, mes tyre edhe Korreshi, kanë denoncuar publikisht mungesën e ilaçeve, pajisjeve dhe shërbimeve bazë në spitale, por kryeministri zgjodhi të mos japë asnjë reagim për këto shqetësime.
