Pas tërmetit me magnitudë 4.5 të shkallës Rihter, të premten e 29 tetorit, është mbledhur ditën e sotme shtabi i Emergjencave Civile në Bashkinë e Bulqizës.
Pas verifikimit të të gjitha raportimeve për dëmet e shkaktuara, Bashkia e Bulqizës ka ngritur grupet e punës për vlerësimin real të dëmeve në terren.
Kreu i bashkisë, Lefter Alla foli për 125 shtëpi të dëmtuara dhe të paktën 7 pallate në të gjithë territorin e Bashkisë.
“Deri tani numri i banesave të raportuara është 125 në të gjitha Njësitë Administrative. Kemi 2 pallate në qytet dhe kemi 5 pallate në Krastë, në Martanesh,” tha Alla.
“Dëmet janë të ndryshme, të lehta, mesatare dhe dëme të rënda,” tha ai.
Bashkia e Bulqizës ka thënë se do të bëhet edhe një vlerësim financiar për dëmet që u shkaktuan nga lëkundjet e mëngjesit të së premtes së kaluar, 29 tetor 2021.
