Ish-Kryeministri Sali Berisha deklaroi sot nga Lezha se Kuvendi Kombëtar i PD do të mblidhet më 11 dhjetor.
Por a do e lejojë kreu demokrat, Lulzim Basha, mbledhjen e Kuvendit Kombëtar, sikundër është shprehur më parë?
Në studion e A2cnn, Gazment Bardhi, Sekretar i Përgjithshëm i PD, tha se Lulzim Basha ka thënë se nuk do të lejojë një Kuvend ku diskutohen vendimet e qeverisë amerikane, por jo se nuk do të mblidhet Kuvendi.
Bardhi u shpreh se ende nuk ka një kërkesë për mbledhjen e Kuvendit dhe se për një vendim të tillë duhet mendimi i kryesisë së PD.
“Ajo që ka thënë zoti Basha, për të mos u keqkuptuar, është që nuk do të ketë një Kuvend Kombëtar ku do të diskutohen vendimet e qeverisë amerikane. Kuvend Kombëtar Partia Demokratike ka pasur, ka dhe do të ketë sa herë që të ketë çështje statutore për të diskutuar. Pra nuk bëhet fjalë këtu për shkrirjen e Kuvendit Kombëtar. Nuk dua të flas në paradhënie për këtë çështje. Deri në momentin që flasim, si sekretar i përgjithshëm, nuk kam administruar asnjë kërkesë për mbledhje të Kuvendit Kombëtar. Cilido që kërkon mbledhjen e organeve të partisë duhet t’i drejtohet sekretarit të partisë, i cili ndjek hapat e nevojshme. Në rastin e Kuvendit Kombëtar do të duhet të ketë një vendim të kryesisë së partisë”, tha Gazment Bardhi.
