Ylli Manjani, ish-ministër i Drejtësisë, përmes një tjetër postimi në rrjetet sociale, ka komentuar përplasjet në Partinë Demokratike, pas vendimit të kreut demokrat Lulzim Basha për përjashtimin e Sali Berishës nga Grupi Parlamentar.
Manjani shkruan se demokratët, nëse duan të jenë ende fuqi politike, duhet të kuptojnë se kanë një krizë drejtimi për të zgjidhur.
Ai shprehet se demokratëve u duhet një kryetar e një ekip që t’i përfaqësojë e jo t’i lërë në baltë.
“Me kryetar forumesh, por pa anëtarësi nuk shkojnë dot më askund…
Sa më shpejt ta zgjidhin këtë krizë aq më mirë për ta, por edhe për politikën në vend.
Përndryshe ta hedhin edhe hapin e fundit e të bien vetë në greminë. Le të lënë Lulin në buzë të saj që t’u hedhë ndonjë lule hipokrizie si përkujtimore.
Ndërkohë SHQUP-i do u bëhet agjensi funerale politike, me VKM të qeverisë së koalicionit…
Ndaj nëse kanë gjë për të bërë duhet ta bëjnë tani. Më vonë është shumë vonë, për të gjithë ne… Na vjen thjesht keq për veten se u lindëm në monizëm e më duket se do vdesim në monizëm”, shkruan Manjani.
