Një infermier në Korçës është arrestuar pasi akuzohet se ka vjedhur medikamente dhe pajisje mjekësore në farmacinë e spitalit ku punonte.
Në pranga është vënë Nikolin Ciko, 43 vjeç, banues në Korçë, me detyrë infermier pranë Urgjencës së Spitalit Korçë.
Policia sqaroi se vjedhjet kanë ndodhur në datat 08.03.2021 dhe 30.08.2021, kur në farmacinë e Spitalit Rajonal Korçë, u vodh një sasi e konsiderueshme medikamentesh e pajisjesh mjekësore me vlerë mbi 1.000.000 lekë.
“Nga veprimet hetimore të kryera rezultoi se, Ciko kishte vjedhur në farmacinë e Spitalit, një sasi medikamentesh dhe pajisjesh mjekësore, të cilat shërbenin për trajtimin e pacientëve me COVID-19 dhe me sëmundje tumorale, ku në cilësinë e provës materiale iu gjet e sekuestrua sasia e medikamenteve”, njoftoi policia.
Hetimet për rastin i kaluan prokurorisë së Korçës, ndërsa infermieri akuzohet për veprën penale “Vjedhja”, me pasoja të rënda.
Vitin e kaluar, Ciko u denoncua nga një emision investigativ televiziv se mashtronte me kurën Covid-19.
Lexo edhe:
