Komisioni Evropian paraqiti sot një paketë prej 530 milion euro në mbështetje shtesë financiare nën Fondin e Solidaritetit të BE (EUSF).
Ndër shtetet përfituese përfshihet edhe Shqipëria, së bashku me Serbinë dhe Malin e Zi. Austria, Belgjika, Kroacia, Çekia, Estonia, Franca, Gjermania, Greqia, Hungaria, Irlanda, Italia, Letonia, Lituania, Luksemburgu, Portugalia, Rumania, Spanja dhe Shqipëria, Mali i Zi dhe Serbia janë shtetet që BE i përfshin për të mbrojtur shëndetin publik në luftën kundër koronavirusit.
Ky financim do të mbështesë një pjesë të shpenzimeve të tyre publike për pajisjet mjekësore dhe personale të mbrojtjes, mbështetjen emergjente për popullatën dhe masat e parandalimit, monitorimit dhe kontrollit të përhapjes së sëmundjes.
Komisionerja për Kohezionin dhe Reformat, Elisa Ferreira tha: “Fondi i Solidaritetit të BE-së është një demonstrim konkret i solidaritetit Evropian në veprim. Që nga krijimi i saj, ai ka ofruar ndihmë dhe lehtësim efektiv për miliona njerëz gjatë kohërave të vështira. Vitin e kaluar, ne zgjeruam fushën e tij për të mbuluar emergjenca të mëdha shëndetësore. Tani ne po propozojmë të mobilizojmë asistencën financiare që lidhet shumë me koronavirusin. EUSF edhe një herë është duke përmbushur misionin e tij kryesor”.
Paketa e ndihmës e propozuar sot gjithashtu përfshin 132.7 milion euro të paradhënieve të marra tashmë nga Gjermania, Irlanda, Greqia, Spanja, Kroacia, Hungaria dhe Portugalia. Mobilizimi i pagesave përfundimtare të EUSF për 17 Shtetet Anëtare bazohet në një vlerësim të plotë të aplikacioneve të paraqitura, duke siguruar qëndrueshmëri në qasjen dhe trajtim të barabartë.
Shqipëria përfiton rreth 900 mijë euro, Serbia mbi 11 milionë euro, ndërsa Mali i Zi rreth 200 mijë euro.
