Ylli Manjani, ish-ministër i Drejtësisë, ka reaguar ashpër në rrjetet sociale, ndaj një postimi të ministres së Shëndetësisë, Ogerta Manastirliu.
Kjo e fundit kishte postuar më parë një foto në rrjet ku shfaqej një punonjës i shëndetësisë, mjek ose infermier, i cili në mes të dëborës, i maste një gruaje tensionin.
“Si ka mundësi që kjo poshtërsi antinjeri e antishëndet të përdoret nga një ministër dhe për më tepër i shëndetësisë!!!”, shkruan Manjani në reagimin e tij.
Postimi nga Ylli Manjani
Ndihma e parë, moj zonja ministre e shëndetit, në një mjedis të tillë fillon me masa të menjëhershme anti hipotermike.
Jo vetëm mjeksia, por edhe protokollet e Kryqit të Kuq, sugjerojnë për këtë rast si masë te parë mbulimin e personit me një batanije dhe jo zhveshjen në mes të borës!!!
Pret puna e matjes së tensionit…
Si ka mundësi që kjo poshtërsi antinjeri e antishëndet të përdoret nga një ministër dhe për më tepër i shëndetësisë!!!
Mirë ministrja, se tani i shohin sytë veç vota, po mjeku/ja a infermieri/ja si mund të bëjë një karagjozllëk të tillë?!
