Në një kohë kur Kryeministri Edi Rama sulmon Bashkimin Europian dhe e fajëson edhe për dështimet e Qeverisë së tij, ministri i Brendshëm, Bled Çuçi, e konsideron BE si një partner të pazëvendësueshëm.
Rama nuk ka nguruar të akuzojë BE edhe gjatë vizitës së tij në Turqi, kur u shfaq në krah të Presidentit Erdogan, lidhur me mbylljen e kufinjve edhe përsa i takon ndihmave dhe trajlerave me pajisjet për të përballuar pandeminë e Covid-19. Gjithashtu, Rama u shpreh se BE u tregua egoiste dhe mendoi vetëm për veten lidhur me vaksinat, duke lënë në mëshirë vendet jashtë BE.
Akuzat e Ramës ndaj BE kanë habitur edhe Ambasadorin Luigi Soreca, i cili jo pak herë është pozicionuar në mbështetje të Kryeministrit, edhe kur janë dhunuar të drejtat e qytetarëve, edhe kur qeveria ka dështuar, apo ka manipuluar zgjedhje.
Por duket se një prej ministrave të Ramës, Bledi Çuçi, ndan një tjetër qëndrim lidhur me BE-në.
“Prita sot në një takim Ambasadorin e BE-së në Shqipëri, z.Luigi Soreca. Diskutuam për vijimin e bashkëpunimit të ngushtë mes Shqipërisë dhe Bashkimit Europian në çështje të interesit të përbashkët që lidhen me rendin, sigurinë, migracionin, luftën kundër krimit të organizuar dhe ndihmën në kuadër të programit IPA III.
Biseduam gjithashtu për punën përgatitore të zgjedhjeve të 25 prillit dhe angazhimin e Ministrisë së Brendshme në këtë proces. Bashkimi Europian mbetet një partner i pazëvendësueshëm për Shqipërinë në procesin e integrimit dhe anëtarësimin e plotë në union”, shkruan Çuçi.
Ndoshta deklarata e ministrit të Brendshëm mund të ketë qetësuar Ambasadorin e BE-së në Shqipëri.
