Kryetarja e LSI-së, Monika Kryemadhi, ka vizituar zonën e Lacit për të parë nga afër situatën e përmbytjeve.
Gjatë bisedës me një fermer të Kurbinit, ai ankohej se nëse gjithcka do të kontrollohej, tokat bujqësore me 30 vite investime nuk do të përmbyteshin.
Ndërsa e fton që të shohin dhe pjesën tjetër, Kryemadhi detyrohet të kalojë në mes të ujit duke thënë: “Këtu është qamet, qamet, qamet”.
Ndërkohë që fliste për dhjetëra hektarë të rrethuar nga uji, fermerit i bie telefoni dhe nuk hezitoi ti përgjigjej duke thënë se ishte i zënë. Kryemadhi e komentoi këtë moment duke thënë, “Rrezik po të shohin në televizor”, dhe vijuan të shihnin tokat e përmbytura.
“Kjo kërkon një studim total të të gjithë mirëmbajtjes së ekosistemit dhe së dyti edhe miradministrimi. Sepse mos funksionimi i Shtabit të Emergjencave, pasi e njëjta gjë ndodhi edhe me tërmetin faktikisht, edhe me pandeminë, tani edhe me përmbytjet.
Sepse nëse institucionet e Meteorologjisë do të funksionojnë dhe do të kenë një rakordim me Ministrinë e Energjetikës që nuk është vetëm për prodhimin e energjisë, por edhe për menaxhimin e digave, që rakordohet qofshin këto privatë apo shtetërore përsa i përket hapjes së digave.
Mungesa dhe prishja e zinxhirit të funksionimit të shtetit ka sjellë një rezultat të tillë që ka krijuar më shumë kriza sesa i ka menaxhuar ato”, tha Kryemadhi.
