Kryeministri Edi Rama ka legjitimuar reagimet e dhunshme të policisë ndaj protestuesve, madje ka paralajmëruar se nuk do të lejohet që sheshi të bëhet përshesh.
“Policia ka qenë përtej kufinjve të tolerancës, qoftë në natën e parë ashtu edhe në ditën e djeshme”, u shpreh Kryministri Edi Rama, ndërsa vizitoi policët e plagosur gjatë protestave.
Rama ka justifikuar policinë në veprimet e saj, duke shtuar se “toleranca e treguar nuk do të thotë gjeni shesh dhe bëni përshesh”.
“T´a harrojnë se ne mund të kthehemi mbrapa dhe të shembim atë që kemi ndërtuar deri më tani, nga ata që duan të vijnë në pushtet”, u shpreh Rama, ndërsa nuk kurseu vlerësimet për Policinë e Shtetit.
Kryeministri akuzoi Presidentin Ilir Meta si orkestrues dhe nxitës të akteve të dhunës, sikundër edhe drejtuesit e opozitës.
Sipas tij, partia e Presidentit po përdor minorenët për pushtet.
“Për çfarë i përdorin minorenët, një pjesë edhe të paguar? Për pushtet? Presidenti ende nuk i ka dënuar aktet e dhunës ndaj punonjësve të policisë, që janë plagosur dhe dhunuar, madje po humbin jetën dritën e syve”, tha Rama.
“Akoma nuk është kujtuar që t’i thotë një fjalë asaj familjeje që rri këtu me zemrën në dorë, nuk ka reaguar për efektivët e policisë.
Po del një orë përpara se po i vjen fundi botës. Inkurajon lukninë dhe vë gishtin mbi policinë, vazhdon dhe u tregon shqiptarëve se dhuna është rruga për të bërë përpara në këtë vend.”
