Kreu demokrat, Lulzim Basha, i ka qëndruar deklaratës së tij në emisionin Opinion, lidhur me fshehjen e numrit të personave që kanë humbur jetën si pasojë e Covid-19.
Mgjithëse pati një reagim, paksa të çuditshëm, nga personeli mjekësor i Infektivit, që hodhi poshtë akuzën e Bashës në drejtim të Kryeministrit, Basha ka shpërndarë në rrjetet sociale videon me deklaratën e bërë mbrëmjen e djeshme.
“Edi Rama po gënjen dhe po fsheh numrin e viktimave të COVID-19 në Shqipëri. Ne kemi detyrën të shpërndajmë të vërtetën në emër të jetëve të humbura”, shkruan Basha në rrjet, duke postuar videon e mëposhtme.
Kryeministri Edi Rama ka reaguar më herët ashpër ndaj akuzave të kreut demokrat, Lulzim Basha, lidhur me fshehjen e numrit të vdekjeve nga Covid-19. Basha iu referuar një dokumenti nga morgu, duke pretenduar se numri i vdekjeve nga Covid është rreth 2 herë më i lartë se ai që raportohet në buletinet ditore të Ministrisë së Shënddetësisë.
“Për akuzën e pashembullt të Lulëzim Bashës, e cila cënon drejtëpërdrejtë integritetin moral e profesional të mjekëve të vijës së zjarrit dhe nxit dhunë ndaj tyre, do t’u drejtohem nesër shqiptarëve me një mesazh të drejtëpërdrejtë, sepse këtu është shkuar shumë shumë larg, përtej çdo caku të politikës së ulët ditore dhe këtu nuk është më fjala thjeshtë për llafet e një aktori të papërgjegjshëm!”, shprehet Rama në një reagim.
