Punëdhënësit që do të kenë një marrëveshje bashkëpunimi me Agjencinë Kombëtare të Punësimit dhe Aftësive (AKPA), si biznes që kontribuon për punësimin, përfitojnë pa tarifë shërbimin e ndërmjetësimit për vendet e punës, programet për kualifikimin e punonjësve dhe të drejtën për të aplikuar në fondin social të punësimit.
Në vendimin e qeverisë të botuar në Fletoren Zyrtare, përcaktohen procedurat, kriteret dhe rregullat e ofrimit të shërbimeve të punësimit për punëdhënësit.
Në vendim thuhet se çdo punëdhënës, që kërkon të përfitojë shërbime nga zyrat e punësimit, duhet të regjistrohet në mënyrë elektronike apo duke u paraqitur vetë pranë strukturave rajonale dhe vendore të AKPA-së. Bizneset e interesuara fillimisht duhet të plotësojnë formularin përkatës, ku përfshihet edhe deklarimi për kontrollin e të dhënave.
Pas regjistrimit në sistemin e shërbimeve të punësimit, ndërmjet punëdhënësit dhe AKPA-së lidhet një marrëveshje bashkëpunimi, në të cilën listohen të gjitha shërbimet që do të marrë punëdhënësi, si dhe të gjitha detyrimet e palëve.
Punëdhënësit, të cilët interesohen vetëm për një shërbim specifik, i cili është detyrim ligjor, nuk do të jenë të detyruar për të nënshkruar marrëveshjen, por do të kenë mundësi të marrin shërbimin e kërkuar menjëherë.
Në përfundim të procedurës, nëse punëdhënësi pranon të marrë shërbimet, sipas procedurave të përcaktuara në këtë vendim, duhet të nënshkruajë një marrëveshje bashkëpunimi, e cila do të përfshijë edhe takimet e planifikuara ndërmjet palëve, si dhe progresin e bërë gjatë bashkëpunimit.
Sakaq, strukturat e punësimit të Agjencisë Kombëtare të Punësimit dhe Aftësive (AKPA) mund të japin shërbime informimi për të dhëna statistikore apo informacione të tjera për tregun e punës për qëllime studimore etj, për organizata, shoqata të ndryshme, agjenci private punësimi apo palë të treta të tjera, kundrejt tarifave, që vendosen sipas legjislacionit të fuqi nga ministria e Financave.
Shërbimet që ofrohen nga AKPA për punëdhënësit e regjistruar
a) informim lidhur me:
i. kërkesat për punësim të tregut të punës;
ii. programet e punësimit, arsimit e formimit profesional dhe mënyrat e aplikimit;
iii. këshillimin për paraqitjen e vendit të lirë të punës;
iv. këshillimin për ndërmjetësimin; v. legjislacionin e punës dhe të nxitjes së punësimit;
b) regjistrim i punëdhënësit në sistemin informatik të shërbimeve të punësimit;
c) publikim i vendeve të lira të punës, të ofruara nga punëdhënësit;
ç) përditësim i të dhënave të tij në sistemin informatik të shërbimeve të punësimit;
d) aplikim e përfshirje në programet e mbështetjes për ndërmjetësim e nxitje të punësimit sipas legjislacionit përkatës;
dh) ndërmjetësim/rekrutim/ofrim kandidatësh potencialë dhe të përshtatshëm për vendet e lira të punës, të ofruara nga punëdhënësi;
e) pajisje me dokumentacionin përkatës, në zbatim të legjislacionit në fuqi për të huajt, shtetasit e huaj, të punësuar pranë punëdhënësit;
ë) informim/këshillim/mbështetje në proceset e marrëdhënieve të punës sipas legjislacionit përkatës;
f) informim/këshillim/regjistrim për punëdhënësit, ofrues të vullnetarizmit, sipas legjislacionit përkatës;
g) informim/deklarim/regjistrim për ofruesit e formimit profesional privat, sipas legjislacionit përkatës. /Monitor/
