Këshilli i Emërimeve në Drejtësi pas shqyrtimit të dokumentacionit të dy kandidaturave për një vend vakant në Gjykatën Kushtetuese ka vendosur të skualifikojë njërin prej tyre.
Me vendimin e sotëm kandidati që do të vazhdojë garën për vakancën e parakohshme në Gjykatën Kushtetuese, e shpallur nga Presidenti i Republikës në datën 22.11.2019, është Sonila Bejtja, ndërkohë është përjashtuar nga gara kandidati Eugen Papandile.
Sipas njoftimit nga KED, shqyrtimi i rasteve të kandidatëve për vendet vakante për gjyqtar në Gjykatën Kushtetuese është vendosur në përfundim të procedurave të verifikimit rigoroz dhe të thelluar të ndjekura nga Këshilli, sipas ligjit dhe standardeve tashmë të njohura e të aplikuara që kërkohen për përzgjedhjen, qenien dhe konfirmimin në detyrën e magjistratit apo anëtarit të Gjykatës Kushtetuese.
Kandidatët për të cilët është vendosur ndalimi, kanë patur mangësi të një apo disa kushteve të parashikuara nga Kushtetuta dhe ligji. Kandidatët kanë të drejtën e ankimit në Gjykatën Administrative të Apelit, jo më vonë së 5 ditë nga dita e njoftimit të vendimit të arsyetuar.
