Masat e Qeverisë së Kosovës për ndalimin e mbajtjes së dasmave dhe eventeve të tjera familjare, si masë për parandalimin dhe kontrollin e përhapjes së koronavirusit, kanë ndikuar në të gjithë “industrinë” e dasmave, duke përfshirë këngëtarët, sallonet e bukurisë e restorantet ku organizohen këto evente.
Për të kundërshtuar këtë vendim të qeverisë, këngëtarët kanë paralajmëruar protestë këtë të hënë në ora 11:00.
I pari që bëri thirrje për organizimin e kësaj proteste ishte këngëtari Labinot Tahiri. Ai përmes një postimi në Facebook kritikoi qeverinë për “diskriminimin” që ua ka bërë, duke ua “mohuar” bukën e gojës.
Thirrjes së Tahirit i janë përgjigjur edhe kolegët e tij këngëtarë. Vetëm pak kohë pas thirrjes publike të Labit, pjesëmarrjen në protestën e së hënës e konfirmuan Edona Llalloshi, Milot Llalloshi dhe Afrim Muçiqi.
Madje, Muçiqi kërkoi nga qeveria t’ua lejojë këngëtarëve mbajtjen e dasmave në restorante, në të kundërtën, paralajmëroi se ato do të mbahen në sheshe.
“Na lejoni t’i mbajmë dasmat në restorante ose do t’i mbajmë në sheshe”.
Edona dhe Milot Llalloshi e kanë shpërndarë në Instastory deklaratën e Muçiqit, duke ia bashkëngjitur konfirmimin: “Edhe unë do të jem aty, edhe të tjerët do të ishte mirë të dalin”.
/Bota Sot
