Zv.ministrja e Shëndetësisë, Mira Rakacolli, tha mbrëmjen e sotme në Abcnews, se janë disa të burgosur të prekur nga koronavirusi, që janë në monitorim, dhe janë asimptomatikë.
Rakacolli nuk dha një shifër se sa është numri, por tha se ato janë në monitorim.
Gjithashtu ajo tha se testet serologjike do të validohen, përpara se të japim rezultatet.
Por, eksperti i Shëndetit Publik, Erion Dasho, tha se i duket e habitshme që në Shqipëri të bëhen validime testesh.
“Më duket e habitshme, pasi ne nuk kemi kapacitete për të bërë validime testesh, pasi ato bëhen nga kompania që i prodhon”, tha Dasho në Abcnews.
Lidhur me masat, Dasho tha se koronavirusi është një sëmundje që kërkon vëmendje, por nuk është luftë.
“Publikut duhet t’i kërkohet të mbrojë veten dhe veçanërisht të mbrohen shtresat më të rrezikuara, që janë moshat e treta”, tha Dasho.
