Mjeku dhe eksperti i shëndetit publik, Erion Dasho, ka deklaruar se gjendja e sigurisë ushqimore në Shqipëri, është jashtëzakonisht alarmante.
Referuar raportit të fundit lidhur me cilësinë e të ushqyerit nga ku Shqipëria ishte renditur si një nga vendet më keq të ushqyer, Dasho u shpreh se kur 1 në 3 qytetarë nuk kanë akses të sigurt në ushqim.
Dasho tha se nuk mund të flitet më për një problem të zakonshëm, por për një krim të mirëfilltë ndaj të drejtës më bazike të njeriut, të drejtës për ushqim.
Ai ngre shqetësimin se në një vend me pasuri natyrore të jashtëzakonshme si Shqipëria, kjo situatë është e pafalshme dhe shkon përtej çdo justifikimi, veçanërisht kur fëmijët janë më të rrezikuarit.
“Kjo është një mënyrë krejt realiste e të parit të këtij raporti. Ky është një problem jashtëzakonisht i rëndë. Madje nuk mund të klasifikohet tek problemet, këtë unë e kam quajtur krim në një status timin, sepse bëhej fjalë për të drejtën më themelore, të drejtën më bazë të njeriut. Bëhet fjalë për ushqyerjen. Kur mendohet se fëmijët kanë nevojë për ushqim të qëndrueshëm, cilësor madje, jo thjesht ushqim për të bërë të mundur zhvillimin e tyre, zhvillimin trupor, zhvillimin mendor, zhvillimin social dhe të mendosh se je në mes të Europës në një nga vendet që ka tokat më pjellore, burimet ujore më të garantuara, klimën më të përshtatshme, ç’mund të thuash pastaj për Spanjën që pothuajse po shkretohet.
Ç’mund të thuash pastaj për Europën e Veriut që ka shumë pak ditë me diell në vit. Pra, në një vend që duhet të ishte një vend që jo vetëm duhet të mbulonte nevojat e popullatës sonë për produkte ushqimore, por të ishte eksportues i rëndësishëm, ne jemi katandisur në pikën kur 1 në 3 persona…sepse kur shikon këto përqindje ndonjëherë qytetari ka nevojë për shpjegim shumë të thjeshtë.
33% që është siguria e rënë ose mesatare ushqimore, do të thotë që 1 në 3 shqiptarë nuk ka të sigurt bukën e gojës. Unë mendoj që nuk bëhet fjalë për një nga ato skandalet e shumta nga të cilat jemi mësuar me këtë qeveri. Pra, ne e hapim qendrën e Tiranës për të ndërtuar kulla oligarkët ose ne japim Portin e Durrës për të ndërtuar gjasme Marina nga biznesmenë të huaj, por që nuk merret vesh se kush po ndërton. Në nuk po ndërtojmë Lungomare ose hotele turistikë që përjashtohen nga taksat për 10 vjet…këto janë skandale më vete por nuk po merremi me këto”, tha Dasho në Syri TV.
