Pas përhapjes së pandemisë së koronavirusit në mbarë Botën, ku numri i viktimave dhe të infektuarve me COVID-19 është i madh, zyrtarët e Pentagonit kanë reaguar rreth asaj se çfarë mund të ndodhë gjatë muajve të ardhshëm.
Pentagoni llogarit një krizë disamujore në SHBA për shkak të koronavirusit, kurse me rikthimin e normalitetit rreth qershorit apo korrikut, sipas tyre, ekziston rreziku që në disa vende të Botës të ketë një kaos politik.
“Bazuar në përvojat me vendet si Kina, Koreja e Jugut apo Hong Kongu, mendoj se duhet të bëhemi gati për një periudhë disamujore”, ka deklaruar gjatë një debati virtual Sekretari amerikan i Mbrojtjes, Mark Esper.
“Duhet llogaritur nga 10 deri në 12 javë”, ka thënë shefi i Shtabit të Përgjithshëm të ushtrisë amerikane Mark Milley, i cili shtoi se llogaritë në 90 ditë bazuar në përvojat e vendeve tjera, mund të vlejnë edhe për SHBA-të.
“Sigurisht se do të shkojë deri në fund të majit, qershorit,ndoshta edhe korriku, por deri atëherë do të bisedojmë sërish”, ka shtuar ai.
Megjithatë, zyrtarët e Pentagonit kanë paralajmëruar se pandemia do të mund të destabilizonte disa vende.
“Të gjitha këto do të mund të shpinin deri te një kaos politik në disa vende. Duhet të jemi të kujdesshëm”, shtoi gjenerali amerikan Milley, i cili pranoi se mungesa e maskave, dorëzave apo edhe respiratorëve do të mund të kishte “pasoja të rënda në disa vende, jo vetëm sa i përket aspektit shëndetësor”.
Në anën tjetër Esper ka premtuar ndihmë për aleatët, por paralajmëroi se “armiq të caktuar mund të veprojnë në atë mënyrë që do të mund të ndikonin në sigurinë e SHBA-ve. Duhet të jemi të vetëdijshëm për këtë dhe të bëhemi gati”.
