Një situatë problematike është krijuar sot në kryeqytet, ku në disa akse ka pasur një trafik tepër të rënduar me radhë kilometrike. E tillë ka qenë situata në rrugën e Dibrës, aksi nga Universiteti Ushtarak e deri tek farmacia 10.
Në videot e siguruara nga Boldnews.al, duken makinat e ndalura totalisht në pritje të clirimit të trafikut por janë dashur mbi 30 minuta për fillimin e lëvizjes. Por me gjithë këtë kaos e trafik, nuk është gjendur asnjë polic për të sjellë normalitetin në qarkullim.
Policinë rrugore e gjen kurdo kur bëhet fjalë për gjoba por jo kur ka realisht probleme, si në rastin e sotëm. Larg o Zot mos ndodhtë ndonjë urgjencë pasi edhe ambulanca është dashur të presë për minuta të tëra në trafik për të vijuar rrugën e saj! Disa efektivë policie, përfshirë edhe punonjëse femra kanë qenë në kryqëzim për të vijuar fushatën e tyre të paralajmërimit për rripin e sigurimit dhe marrjen e masave sipas ndryshimeve të nenit 170 të kodit rrugor, pasi në të kundërt do të ketë gjoba të rënda për drejtuesit, por nuk janë gjendur për të rikthyer lëvizjen në qarkullim.
Por ky nuk ka qenë i vetmi aks i bllokuar. E njëjta situatë ka qenë edhe tek rruga “5 maji” dhe rrugët që lidhen me të. Po kështu për shkak të punimeve në rrjetin e ujësjellësit një pjesë e Unazës pranë Urës së Tabakëve ka qenë e ngarkuar. Edhe në Tiranën e Re, rruga e Parisit dhe nga stadiumi “Selman Stërmasi deri tek shkolla “Vasil Shanto”, trafiku ka qenë tepër i rënduar. E qytetarët e Tiranës përballen cdo ditë me këtë situatë që është kthyer në stres për ta, ndërsa zgjidhja edhe pas gjobave duket ende larg.
(Boldnews)
