Barcelona do të përballet në orën 18:30 në shtëpi me Real Sociedad-in, me misionin e qartë për të hedhur pas krahëve dështimin në “El Clasico”. Të gjithë prisnin një lloj reagimi të kampionëve në fuqi në sfidën e Madridit, megjithatë Barça luajti mirë vetëm në fraksionin hapës, një pjesë ku skuadra blaugrana meritonte të shkonte në interval me një avantazh me gola diferencë.
Natyrisht nuk është as hera e parë dhe as e fundit që Barcelona mundet në duelin më të ndezur të Spanjës, sidoqoftë bën përshtypje rënia e ekipit në pjesën e dytë dhe sidomos performanca e yllit të skuadrës Lionel Messi.
Kapiteni i Barçës ishte një ndër futbollistët më të dobët në fushë, por mbi të gjitha golashënuesi më i mirë në Primera Division shpërdoroi mundësi të shkëlqyera që mund të kishin ndryshuar krejtësisht fatin e këtij takimi, megjithëse për hir të së vërtetës u bë vërtet shumë kohë që Mesi nuk ia del t’i shënojë skuadrës merengues.
Ndaj Real Sociedadit nuk do të jetë aspak e lehtë, duke marrë parasysh faktin që aktualisht skuadra po kalon një formë mjaft të mirë me tre fitore radhazi në kampionat, por edhe për faktin që Real Sociadat gjithmonë ka qenë një kockë e fortë për ekipet elitare spanjolle. Sociedad aktualisht renditet në vendin e 6-të në kuotën e 43 pikëve, vetëm 2 pikë më pak se vendi i katërt që të kualifikon në Ligën e Kampioneve.
Formacionet e mundshme:
Barcelona: Ter Stegen; Semedo, Pique, Lenglet, Alba; De Jong, Busquets, Arthur; Fati, Griezmann, Messi
Real Sociedad: Remiro; Zaldua, Elustondo, Le Normand, Monreal; Merino, Zubeldia, Odegaard; Oyarzabal, Isak, Januzaj
