Etilda Gjonaj, ministre e Drejtësisë, e kallzuar penalisht në SPAK nga Presidenti Ilir Meta, i cili e konsideron si pjesë të strukturave të larta të përfshira në atë që Kreu i Shtetit, e cilëson si “grusht shteti” ka reaguar ndaj akuzave.
Ndërsa ka shmangur komentet lidhur me kallzimin penal të depozituar në SPAK, Gjonaj ka zgjedhur të artikulojë akuza politike në drejtim të Metës.
Gjonaj tha se akuzat e Kreut të Shtetit ishin një seri spektakli, me fjalë të padenja në drejtim të saj.
“Unë u rezervoj të gjithë keqardhjen time për hallin e madh që i motivion në luftën kundër reformës në drejtësi, por akuzat ndaj meje nuk ua lehtësojnë këtë hall”, tha Gjonaj.
Në vijim ajo tha se nuk ka reaguar më parë pasi ka gjykuar se i duhej lënë Presidentit koha dhe hapësira mediatike për të ezauruar seritë e spektaklit të tij për grupin armiqësor dhe kriminal në Ministrinë e Drejtësisë.
“S’e bëj për t’ju përgjigjur Presidentit për morinë e akuzave dhe fjalëve të padenja që ka lëshuar në drejtimin tim personalisht apo përmes zëdhënësit të tij.
Unë u rezervoj të gjithë keqardhjen time për hallin e madh që i motivion në luftën kundër reformes në drejtësi, por akuzat ndaj meje nuk ua lehtësojnë këtë hall.
Presidenti ka krijuar këtë kauzë fiktive në funksion të betejave të tij që s’janë në përputhje me interesat e tij Kushetuese në momentin më të rëndësishëm që po kalon Shqipëria, në prag të negociatave”, tha Gjonaj.
Gjonaj theksoi se Meta mendon se është bërë komplot, meqë është punuar edhe ditën e shtunë.
Ajo akuzoi Presidentin se nuk ka respektuar afatet lidhur me caktimin e anëtarëve të Gjykatës Kushtetuese, duke shtuar se automatikisht zgjedhja bëhej duke respektuar renditjen e KED-së.
“Botimi në Fletoren Zyrtare nuk ka cënuar asnjë kompetencë të Presidentit dhe as ka sjellë ndonjë pasojë, përveç faktit se ka bërë njohjen botërisht të vendimit se Arta Vorpsi ishte anëtare e Kushtetueses, bazuar në renditjen e KED dhe kalimin e afatit nga Presidenti”, tha Gjonaj.
