Pavarësisht situatës së krijuar nga tërmeti dhe mijëra qytetarëve që kanë mbetur pa shtëpi, Kryeministri Edi Rama nuk ka ndalur sulmet ndaj mediave.
Ndërsa vizitoi sot njërën prej familjeve që tërmeti i 26 nëntorit i dëmtoi banesën në fshatin Arbanë, Rama i kërkoi të zonjës së shtëpisë që të fikte televizorin.
“Aman, fike atë se është si shejtani në shtëpi”, iu drejtua kryeministri qytetares, e cila nuk ngurroi t’i bindej fjalës së tij.
Biseda vijoi më tej normalisht, por nuk munguan batutat e përhershme me pronarët e banesës së rindërtuar.
Para tërmetit të 26 nëntorit, Rama që fushatën zgjedhore e bazoi te tepsia, i cilësonte mediat si kazan, ndërsa pas tërmetit humori i Kryeministrit nisi të lëkundej, pasi mediat publikonin dhe evidentonin fakte, mbi abuzimet me ndihma apo reagimin e dobët të strukturave të qeverisë, lidhur me tragjedinë.
Në kushte të tilla, Rama shtoi dozën e akuzave, kërcënimeve dhe paralajmërimeve për mbylljen e mediave, duke kujtuar faktin se vendin ndodhej në gjendje të jashtëzakonshme, madje duke sjellë si shembull reagimin e qeverisë në Japoni në situata të ngjashme.
