Publicisti Agron Tufa ka paditur në prokurori deputetin socialist Spartak Braho dhe ish-ambasadorin Fatos Tarifa. Avokati Kujtim Cakrani tha se ndaj klientit të tij, drejtorit të ISKPK, Agron Tufa, ka pasur kërcënime të ndryshme si nga administrata ashtu edhe nga njerëz të tjerë.
“Janë riaktivizuar duke hedhur baltë ndaj zotit Tufa duke e akuzuar për vjedhje fondesh shpërdorim detyre dhe falsifikim të historisë. Tufa u largua pasi pati një arsye të fortë iu kërcënua familja e tij”, tha avokati.
Deputeti socialist, Spartak Braho akuzoi Tufën pak ditë më parë se kishte grabitur lekët e shtetit dhe po largohej si të parët e tij në vitin 1944.
“Tufa iku si ballistët e tij të dashur dikur. Plot 75 vjet më parë kriminelët e luftës të Ballit të Mit’hatit dhe kolaboracionistët, pasi kishin kryer krime të përbindshme, kishin vrarë dhe plaçkitur sa deshën, i mbathën mbathën nga sytë këmbët në fundin e nëntorit dhe fillimin e dhjetorit 1944 jashtë vendit. 75 vjet më pas Tufa ndoqi këtë shembull, që me sa duket e ka bluar gjatë në mendje. Ai e kishte gati precedentin dhe skenarin dhe e ndoqi me përpikmëri atë skenar. Tufa iku i ngopur me lekët e shtetit e të Kuvendit tek të parët e tij që ikën si minjtë në vitin 1944. Ai iku për t’iu shmangur drejtësisë si Mitat Frasheri e co. në vitin ’44. Kjo është e qartë dhe një e vërtetë që nuk e luan as topi”, tha Braho.
Akuza ndaj Tufës hodhi edhe nga sociologu Fatos Tarifa.
“U largua një qytetar i padenjë i Republikës, i cili, të gjithë karrierën e tij akademike e profesionale e kishte ngritur mbi një mashtrim të madh. U largua një plagjiator, që vodhi studimet e të tjerëve dhe me to fitoi një gradë shkencore të pamerituar, të cilën Universiteti i Tiranës dhe Ministria e Arsimit, për turpin e tyre, nuk ia hoqën. U largua një falsifikator i paskrupullt dhe i rrezikshëm i njërës prej periudhave më të ndritura të historisë sonë kombëtare, asaj të Luftës Antifashiste Nacionalçlirimtare. U largua një drejtues i padenjë i një institucioni”, tha ai.
Agron Tufa dha dorëheqjen pak ditë më parë nga posti i Drejtorit të Institutit për Studimin e Krimeve dhe Pasojave të Komunizmit dhe ndodhet me familjen e tij për azil në Zvicër.
