Presidenti Donald Trump ka njoftuar vendosjen e tarifave të reja prej 25% për makinat dhe kamionët që importohen nga Bashkimi Evropian në Shtetet e Bashkuara.
Ai e justifikon vendimin me pretendimin se BE nuk po respekton marrëveshjet tregtare mes dy palëve.
Sipas tij, kompanitë europiane mund të shmangin tarifat nëse hapin fabrika dhe prodhojnë automjete brenda SHBA-së.
Ky vendim ka shkaktuar reagime të forta në Evropë. Zyrtarë të Parlamentit Europian kanë mohuar shkeljen e marrëveshjeve dhe kanë kritikuar mënyrën se si administrata amerikane po trajton partnerët tregtarë.
Masat e reja pritet të prekin veçanërisht industrinë automobilistike gjermane, përfshirë marka të njohura si Volkswagen, BMW dhe Mercedes-Benz. Ekspertët paralajmërojnë se tarifat mund të rrisin çmimet në tregun amerikan dhe të ulin fitimet e kompanive europiane.
Bashkimi Evropian po shqyrton mundësinë e kundërmasave, gjë që mund të çojë në një përshkallëzim të ri të tensioneve tregtare mes dy ekonomive më të mëdha në botë.
