Hoxhë Elvis Naçi ka qenë pranë të prekurve nga tërmeti në këto ditë të vështira dhe ka bërë thirrje për mbledhjen e fondeve që do shkojnë për ndërtimin e shtëpive. Ditën e djeshme Naçi ka bërë një tjetër gjest madhështor. Me anë të një postimi në rrjete sociale, hoxha ka bërë të ditur se ka dhuruar 10 mijë euro nga të ardhurat e tij personale.
“Sot une dhurova 10 mije euro nga te ardhurat e mija personale, dhuro edhe ti per Shqiptaret qe i jane rrenuar shtepiat! Bashkohu me nismën e madhe”, shkruan Naçi.
Ai ishte i pranishëm në Mbledhjen e Komitetit Kombëtar të Rindërtimit. Nga fondacioni i tij janë mbledhur 2 milion euro dhe priten rreth 3-4 milion. Naçi tha se së shpejti do bëjë transparencë të plotë të të ardhurave. Duke qenë se prej kohësh është thënë se do i futet politikës, Naçi sqaroi se nuk do të merret kurrë me politikë.
“Nuk merrem me politikë, pavarësisht se më kanë akuzuar. Jemi të barabartë. Këtu jemi të gjithë të barabartë në fusha të ndryshme, të gjithë kemi kontribuar. Barazia në këtë tryezë, hapi i parë për të ngrohur ata që janë të varfër. Ne në këtë tryezë do të bëjmë transparencën edhe të fondeve të njëri-tjetrit. Unë nuk kam asnjë post dhe nuk do të merrem asnjëherë me politikë”
