Nga Boldnews.al
Kompania e sigurimeve “Atlantik” është vendosur në qendër të akuzave nga qytetarët për mashtrim me siguracionin e makinave. Ka qënë avokatja Enida Bozheku e cila nëpërmjet një statusi në profilin e saj në facebook denoncon këtë megaskandal që prek udhëtarët shqiptar që përdorin tragetet Bari-Durrës.
Sipas denoncimit, në sheshin e pushimit në Bari është një zonjë e cila pret siguracion për makinat për afatet 15, 30 dhe 45 ditë. Siguracioni mban vulën e kompanisë së sigurimeve Atlantik, ndërsa është e çertifikuar edhe nga “Byroja Shqiptare e Sigurimit”.
Por sipas avokates Bozheku ky siguracion i prerë në Bari, rezulton të jetë fals ose i dalë ilegalisht në treg. Kjo pasi çdo makinë që mbërrin me traget në Durrës nuk i njihet ky siguracion ndërsa u kërkohet udhëtarëve të ripresin siguracionin.
Avokatja Bozheku shprehet se ishte një nga “viktimat” e këtij mashtrimi të turpshëm. Sipas saj me dhjetra makina qëndrojnë në radhë të gjata duke kundërshtuar prerjen e siguracionit të makinës për herë të dytë.
Të gjendur përballë këtij mashtrimi nga kompanitë e sigurimit, Bozheku shprehet se disa qytetarë janë detyruar të paguajnë rryshfet tek punonjësit e Portit të Durrësit.
Në fund të statusit, avokatja Bozheku i bën thirrje prokurorisë që të nis hetimet mbi këtë fenomen që rëndon kryesisht mbi xhepat e emigrantëve që zgjedhin Shqipërinë për të kaluar pushimet.
